Олимпиядай «къизил»
16-ноябрдиз Грециядин Олимпияда тайский боксдай дуьньядин кIвенкIвечивал патал са шумуд юкъуз давам хьайи акъажунар акьалтIна. Ана милли 109 командади, санлай къачурла, 900 спортсменди чпин устадвал къалурна. Россиядин хкянавай командадик кваз иштиракай дагъустанвийри 4 медаль къазанмишна, абурукай кьвед къизилдинбур я. 14 йисал къведалди яшара авай жаванрин арада къизилдин медалдиз, гьакIни чемпионвилин тIварцIиз лайихлу хьайибурукай сад чи ватанэгьли, вичин ери-бине къадим Ахцегьай тир, 2013-йисуз дидедиз хьанвай Мугьаммад Гьажиев (56 кг) я.
Алай вахтунда вичин хизандихъ галаз Каспийск шегьерда яшамиш жезвай жаванди А. Аджиеван тIварунихъ галай 12-нумрадин гимназияда 7-классда кIелзава. А.М. Мирзабегован тIварунихъ галай СШОР-да старший тренер, чи ватанэгьли Мегьамед-Али Ханвердиеван гъилик устадвал хкажзава. Спортдин майданра гъалибвилер Мугьаммада идалай виликни къазанмишнава. Кьилди къачуртIа, ам Кавказдин Кубокдин сагьиб, Дагъустандин ва Россиядин кIвенкIвечивал патал акъажунрин гъалибчи ва призёр я. Ада Махачкъала шегьердин кIвенкIвечивал патал акъажунра галаз-галаз пуд сеферда 1-чкаяр кьуна.
Дугъриданни, намуслу зегьметди хьиз, кардив рикI гваз эгечIуни, рикIе гъалибвал къазанмишунин ният-къаст хьуни, дуьз рехъ къалурдай диде-бубадин ва тренер-насигьатчидин куьмекни хьайила, хъсан нетижа гудайди Мугьаммада чаз мад сеферда тестикьна.
Рагнеда Рамалданова