Тежрибалу шофер Юсуф Шамхалов чин тийидай кас Ахцегьа бажагьат ава. Адан тIвар инсанри гьуьрметдивди кьазва. И кардихъ себебарни авачиз туш. Юсуфа жемятдиз гьакъисагъвилелди къуллугъзава. Эхиримжи йисара ада пар чIугвадай хсуси гъвечIи машиндал кIвалахзава. Чина хъвер авай, гьасятда куьмекдиз къвез гьазур, хуш къилихрин ам акурла, инсанрин гуьгьуьлар ачух жеда.
Ахцегьрин 2-нумрадин юкьван школада кIелзавай вахтунда ам амай аялрилай гьар са карда тафаватлу жезвай. Ю.Шамхалова школадин общественный уьмуьрдани активдаказ иштиракзавай. Ам хъсан спортсменни тир. ЧIехи классра кIелзавайла, Юсуфан рикI иллаки автоделодин тарсарал алай. Махсус майдандал машинар гьалдайлани, Ю.Шамхалова хъсан нетижаяр кьалурзавай.
Школа куьтягьай 1982-йисуз ам вичин пак тир буржи тамамарун патал армиядин жергейриз фена. Аскервиляй хтайла, 1984-йисуз, Махачкъалада автошколадик экечIна. Шофервилин пеше къачур жегьил. Ахцегьрин заготбазада кIвалахдив эгечIна.
Юсуф хъсан багъманчини я. Вичин кIвалин вилик квай багъдай ада гьар жуьре сортарин ичерин, чуьхверрин ва маса емишрин, салан майвайрин бул бегьерар къачузва. Зегьметдал рикI алай и касдиз акъвазун чидач.
Къуй адахъ гележегдани чандин сагъвал ва гъиле кьазвай къени гьар са карда агалкьунар хьурай!
Рагьидин Эминов
