РД-дин хуьруьн майишатдин ва недай суьрсетдин министерстводин алай йисан 13-апрелдин  16-нумрадин къарардихъ галаз кьадайвал “Як ва якIун суьрсет маса гунал гуьзчивал гужлу авунин гьакъиндай” Ахцегь райондин кьилин 169-нумрадин (11-сентябрь)  къарар акъуднава.

Ана къейднавайвал, як ва якIун суьр­сет ихтиярсуздаказ маса гузвай алишверишдин чкаяр дуьздал акъудунин рекьяй комиссия тешкилнава. Ерилуди ва хатасуз тирди тестикьарзавай документар авачиз (ветеринарный ша­гьа­датнамаяр, справкаяр, еридин пата­хъай ийизвай истемишунриз жаваб гузвайвилин гьакъиндай декларацияр, товаротранспортный накладнояр) як ва якIун суьрсет маса гун къадагъа ийизва ва икI мад.

— И къарар кьилиз акъудун патал чна вуч авунва лагьайтIа, районда як ва якIун суьрсет маса гузвай вири туьквенар (абурун кьадар цIудалай пара я) авай гьал, абуру  кIвалахзавай те­гьер ахтармишнава,- лугьузва Ахцегь райондин УСХ-дин начальник Арген Гьажиева. — Як ва якIун суьрсет закондив кьурвал маса гудай ихтияр авайвилин гьакъиндай райондин реестр туькIуьрзава. Адак акатун патал ИП-ри (индивидуальный предприниматель) са гьафтедин вахтуналди район­дин хуьруьн майишатдин управленидиз (УСХ) талукь тир документар (абурун сиягь агъадихъ гузва) гъана кIан­да. Акси дуьшуьшда абуруз як маса гудай ихтияр авач, еке жермеяр или­тIунин ва маса гузвай суьрсет вахчунин къурхулувилик акатда.

—  Арген Гьажиевич, куьне районда як маса гузвай туьквенар авай гьал ахтармишна лагьана. Гьихьтин гьалар ава анра?

— Куьрелди, рази жедай гьалар авач: парабур ГНИ-да регистрация авунвач; вирибурухъ электронный ветеринарный cертификатар авач; як маса гузвай чкайри СанПиН-дин истемишунриз жаваб гузвач ва икI мад. Ви­ликрай Ахцегьа гьич санани авачир хьтин еке ва къулай гурлу базар авай. Ажеб тир, гьахьтин базар арадал хкиз хьанайтIа. Къе базардин экономикадин шартIара ам чарасуз герек я.

Чарасуз  документрин  сиягь:

— налогрин къуллугъда ИП реги­ст­­­рация авунвайвилин гьакъиндай шагьа­датнама;

— хсусиятдин ихтияр тестикьарзавай арендадин икьрар ва я документар;

— СЭС-дин ва пожарный инспек­циядин патай ихтияр гузвай чар;

— дезинсекциядин, дезинфекциядин ва дератизациядин серенжемрин гьакъиндай икьрарар;

— зирзибил хутахунин ва тергунин гьакъиндай икьрар;

— вентиляциядин ва кондициони­рованидин къурулушрин дезинфекция авун патал икьрар;

— къуллугъчийрин санитарный книжкаяр;

— продукция патал справкаяр ва 4-нумрадин ветеринарный форма (продукция рекье твазвайда туькIуьрзава);

— Роспотребнадзордиз уведом­ление.

Ибур як маса гудай туьквен ачухун патал лап эвелдилай чарасуз документар я. Бизнесдин жуьредилай аслу яз, дегишвилер хьун мумкин я.

Базарда ва недай шейэрин туьквенда як маса гун патал туьквендиз къуллугъдай документар ва пожарный инспекциядин ихтияр герек къвезвач. И дуьшуьшда анжах арендадин икьрар хьана кIанда.

Дашдемир Шерифалиев