“Лезги газетди” алай йисан 33-нумрадиз акъатнавай “Тарифдиз лайихлубур” макъалада­ адан авторди, Кьурагь райондин КIирийрин хуьряй тир пенсионер Анвар Къафарова, алай вахтунда почтадин ала­къа­дин отделенийрай виликдай хьиз газдин, экверин пулар гуз тежезмайдакай, бязи дуьшуьшра газдин, экверин пулар ганвач лугьуз,­ инсанрал буржар илитI­завайдакай кхьенвай. “…Чун, КIирийрин хуьруьн агьалияр, газдин, экверин пулар гун патал вацра садра, рекьиз 140 манатдив агакьна харж ийиз, я Кьурагьиз, я Кьасумхуьрел фена кIанзава. Са гафуналди, халкь кIеве гьатзава. Чкадал гуз жедай мумкинвал аваз, вучиз ятIани чун патал финиз мажбур жезва. За “Лезги газетдин” редакция­дивай и месэладай кьил акъудун тIалабзава. Мумкин я, маса хуьрерани ихьтин гьалар арадал атун…” — къейд­навай агъса­къал­ди вичин макъалада.

Лагьана кIанда, газ ишлемишунай агьалийрал гьахъсуздаказ буржар илитIзавай­дакай хабар гузвай чарар редакциядиз виликдайни атанай. Эгер абонентди гьар вацра, вахт-вахтунда пул гузва­­тIа, адав и кар тестикьарзавай квитанцияр гватIа, бес буржар гьикI арадал къвезва? И ва Анвар Къафарован макъалада къарагъарнавай муькуь месэладай кьил акъудун патал зун “Газпром межрегионгаз Махачкъала” ООО-диз фена. Зи суалриз жемиятдихъ ва СМИ-рихъ галаз алакъаяр хуьнин рекьяй карханадин генеральный директордин советник Сапият Идрисовна Акаевади жавабар гана.

Адан гафаралди, газ ишлемишунай буржар арадал атунин тахсиркар идара ваъ, абонент я. Кар ана ава хьи, къанундал асас­лу яз, абонентди гьар вацран эхирдай (25-числодалди) газдин идарадиз счетчикдин эхиримжи рекъемрикай хабар гана кIанзава. И делилрин бинедаллаз, идарадин векилди абонентди вацра гьикьван газ ишлемишна­ватIа гьисабзава ва акъатзавай пулдин кьадар компьютерда махсус программада къейдзава.

Гзаф вахтара абонентри газдин идарадив счетчикдин рекъемар агакьарзавач. Ихьтин дуьшуьшра идарадин векилди, абонентди вилик варцара гайи пулдин кьадардин юкьван гьисаб фикирда кьуна, программада пулдин дуьм-дуьз ваъ, тахминан кьадар твазва. Ам гьакъикъатда абонентди ишлемишнавай кьадардилай тIимилни хьун мумкин я, гзафни. Гьа икI, абонентдиз гьич хабарни авачиз, вацра-вацра бурж арадал къвезва.

Къейд ийин хьи, гьар вацра рекъемар агакьарунин месэла кардик кухтадалди вилик абонентди “Газпром межрегионгаз Махачкала” ООО-диз и кардин патахъай чар кхьена кIанзава. Гуьгъуьнлай абонентдин кIвализ счетчик тамамдиз ахтармишун патал­ газдин идарадин векил къведа. Гьар вацра газдин ида­радив рекъемар агакьарун патал абонентрин къуллугъдин  8-961-837-26-07 нумрадиз зенг ийиз жеда.

Кьвед лагьай месэладин патахъай. Сапият Акавовади къейд авурвал, Дагъустандин мулкарал алай почтадин алакъадин вири отделенийра газ ишлемишунай пул гуз жезва. И месэладин жигьетдай “Газпром межрегионгаз Махачкала” ООО-ди Дагъустандин поч­тадин алакъадин Управленидихъ галаз икьрар кутIуннава. Амма и карда са дегишвал гьатнава. Виликдай почтадин алакъа­дин отделе­нида газдин пул гудайла, компьютердин программада абонентдиз талукь делилар кхьейла, адан лицевой счетдин нумра акъатзавай. Гила программади абонентдин анжах тIварни бубадин тIвар (отчест­во) къалурзава. И кардин себеб Да­гъус­тандин Гьукуматди кардик ку­тунвай Единый платежный документдихъ (ЕПД) галаз алакъалу я. И документ кардик акатайдалай кьулухъ виликан программайри абонентрин лицевой счетрин нумра къалурзамач. ЯтIани, почтадин алакъадин отделенийра газ ишлемишунай пулар кьабулун давамар­зава. Гьар са абонентдивай и къуллугъдикай менфят къачузни жеда.

Лицевой счетдин нумра акъатзавач лугьуз, бязи абонентар почтадин отделенида пул гунивай къерех жезва. Сапият Акавовади алава хъувурвал, ЕПД кардик акатунихъ галаз алакъалу яз, квитанциядал лицевой счетдин нумра къалурзамачтIани, программада пул ганвай абонентдикай вири делилар амукьзава (мус, гьикьван пул ганатIа, фамилия, тIвар, яшамиш жезвай чкадин адрес, лицевой счетдин нумра ва мсб). Гьавиляй почтадин отделенийра гьар са абонентдивай инанмишвилелди пул гуз жеда.

Лагьана кIанда, интернет кардик акатунихъ галаз алакъалу яз, газ ишлемишунай пул, санизни тефена, ацукьай кIваляйни гуз жезва­. Ихьтин къулайвиликай менфят къачун патал смартфонар патал акъуднавай “МОЙГАЗ” приложенидикай, я тахьайтIа, “Газпром межрегионгаз Махачкала” ООО-дин сайтда “Абонентдин хсуси кабинет­дикай” менфят къачуз жеда. Идалайни гъейри, “Абонентдин хсуси ка­бинетдин” куьмекдалди газдин идарадив счетчикдин рекъемар агакьариз, лицевой счетдин детализациядиз (ганвай пуларин гьахъ-гьи­саб) килигиз жеда. Кьилинди, пул гун патал нубатра акъвазун, санай-масаниз фин, рекье улакьриз гузвай алава пулар харж авун герек жезмач.

Абонентрин фикирдиз: эгер квехъ газ ишлемишунай ганвай пулдин патахъай суалар, газдин майишатдин контролеррин, чкадин абонентрин пунктунин къуллугъчийрин гьерекатрин жигьетдай наразивилер аватIа, “Газпром межрегионгаз Махачкала” ООО-дин руководстводиз чар рекье тваз жеда. Адрес: Махачкъа­ла, М.Ярагъидин тIварунихъ галай куьче, 1-нумрадин дарамат. Индекс: 367015. Чарар, интернетдикай менфят къачуна, электронный почтадин info@dagrgk.ru адресдиз ракъурайтIани жезва. Телефондин нумра: 8-800-100-59-90.

Мегьамед Ибрагьимов