Дагъустандин госуниверситетдин 500-далай виниз выпускникри и вуздин 95 йис тамам хьайи йисуз яру дипломар къачуна.
ДГУ-дин ректор Муртазали Рабада­нова къейд авурвал, арадал гъайи чIа­валай къенин йикъалди университетди, сифтегьан 75 студентдилай ва 10 муаллимдилай башламишна, алай аямдин гзаф хилерай образование гудай комплексдал агакьдалди баркаллу рехъ атIанва: алай вахтунда ина саки 19 агъзур касди чирвилер къачузва, илимдинни педагогвилин коллектив 800 касдикай ибарат я. ГьакIни, ректорди къейд авурвал, цӀи университетди мад са лишанлу вакъиа къейдна: вузди 150 агъзур лагьайди тир выпускникдиз диплом гана.

Студентрин илимдин ва карчивилин мумкинвилер вилик фенвайди вуздин руководителди кьетIендаказ къейдна. Алай йисуз выпускной квалификациядин 13 кӀвалах стартаприн жуьреда тамамарнава.

«Ватандин образованидин, илимдин, промышленностдин баркаллу адетар давамарунин ва уьлкведин технологический рекьяй регьбервал мягькемарунин везифаяр куь хиве гьатнава», – лагьана Рабаданова.

Россиядин Игит, Дагъустандин милли политикадин ва динрин крарин рекьяй министрдин везифаяр вахтуналди­­ тамамарзавай, гьа са вахтунда ДГУ-дин выпускник Темирлан Абутали­мова къейд авурвал, университет акьал­тIарун­ гьар са касдин уьмуьрда важиблу вахт я. ДГУ лагьайтӀа, 95 йисан вахтунда Кеферпатан Кавказдин образованидин кӀвен­кӀвечи центрайрикай сад яз амукьзава.

«Дагъустандин жегьилар бажарагълу, къаст авай, савадлу ва активный лап хъсан адетралди тербияламишнавайбур я. Куьне и гафарин гьахълувал субутзава. Куьн я чи уьлкведин гележег. За рикӀин сидкьидай умудзава хьи, куьне жуван пешекарвилин кӀвалах хайи республикадихъ галаз алакъалу ийида. ГьикӀ лагьайтӀа, ина экономика, илим, образование ва культура вилик тухудай вири шартӀар яратмишнава», – лагьана министрди. Идалайни гъейри, ада дяведин махсус серенжемдин иштиракчияр – ДГУ-дин юридический институтдин студентар тир Иса Шагьбановав ва Ариф Алиевав дипломар вахкана.

Мотострелковый отделенидин мл. сержант, «Жуьрэтлувиляй» медалдин ва Россиядин оборонадин министерстводин шабагьдин сагьиб Иса Шагьбанова кӀелунин йисар гьар са жегьил патал уьмуьрдин имтигьанрин, чӀехи хьунин, инсанвилин къамат арадал атунин вахт хьайидини къейдна.

«Вад йис идалай вилик завай жуван уьмуьр икьван дегиш жедатӀа гьич фикирдизни гъиз жедачир. И вахтунда закай неинки гележегдин пешекар, гьакӀ дяведин махсус серенжемдин иштиракчини хьана. Къуй университетди чаз гайи чирвилер ва вердишвилер гележегдин агалкьунар патал мягькем бине хьурай», – лагьана Шагьбана, вичин юлдашрихъ элкъвена.

Выпускникрин патай мярекатдал Россиядин Федерациядин Президентдин тIварцIихъ галай стипендия къачур физикадинни технический факультетдин выпускница Алина Рабаданова рахана. Профессорринни преподавателрин патай жегьил пешекарриз теб­рикдин гафар философиядин илимрин доктор, онтологиядин кафедрадин заведующий, РД-дин илимдин лайихлу деятель, РФ-дин кьилин пешекар образованидин гьуьрметлу работник, ДГУ-дин выпускник Мустафа Билалова лагьана.

Жасмина Саидова