Гатун са йикъа хъуьтIуьн са варз тухар­да, – бубайрин и мисалдин гьахълувал­ ви­ридаз ашкара я. Уьзуьмлухрани багъ­­лара, теп­ли­цайрин майишатрани про­из­вод­стводин маса хилера агротехника­дин серенжемар кьиле тухун да­ва­ма­ру­нихъ галаз санал хуьруьн майишат­дин­ карханаяр, лежбервилинни фермер­вилин майишатар ва кьилдин ксар - арен­даторар и йикъара агакьнавай гад кIватI хъувунал ва мал-къарадиз алафар гьазурунал машгъул я. Неин­ки СтIал Сулейманан район­да, гьакI санлай респуб­ликада кIвен­кIвечи агрохолдингрикай сад тир «АлиЯК» ООО-да гатфарин чуьлдин кIвалахар хъсан еришралди тешкиллудаказ кьиле физва.

И йикъара райондин хуьруьн майишатдин ва суьрсетдин управленидин начальник Къазиагьмед Къазиагьмедовахъ, адан замести­тель Къазиагьмед Абумислимовахъ ва кьилин пешекар Гьамидин Абдулкъафаровахъ га­лаз­ чун «АлиЯК» ООО-дин магьсулрин никIериз ва векьин уьруьш­риз фена. ЦIийи Макьарин хуьруьн кьилихъ галай Яргъи никIера мухан кьилери пакаман кьезил шагьвардал лепе гузва, гуя абуру, чеб гьасилай лежберриз, юкь агъузна, икрам ийизва. Къизилдин ранг акьалтнавай никIер акурла, гуьгьуьлар шад жезва.

УСХиП-дин начальник Къазиагьмед Къазиагьмедова ва «АлиЯК» ООО-дин управляющий Аб­рек Шерифова чаз лагьайвал, агрохолдингдихъ 465 гектар ни­кIер ава. Кьулан СтIалрин хуьруьн мулкунал мух гвена акьал­тIар­на­ва. Алай вахтунда гад агудунин кIва­лахар калун участокда давамарзава. Гектардин бегьерлувал 30-35 центнер яз, никIерай 1000 тонндив агакьна техил кIватI хъувунва.

Чун фейила, Яргъи никIер участокда гад агудунал тежрибалу механизаторар тир Мукаил Рамазанова ва Рамазан Балафендиева идара ийизвай гьа карханадин цIийи 2 комбайн машгъул тир.

– За гатун вахтунда комбайндал кIва­лахиз саки 10 йис я, – лугьузва Р. Балафендиева. – Магьсулрин никIер, анра дигмиш хьанвай техилдин бегьер акурла, шадвал акатзава, кIвалахиз ашкъи къвезва. Бул хьурай техилар!

Комбайнийри кIватI хъувур техил прицепар галай кьве машинди харманрал хутахзава. Гад агудай никIерай гуьгъуьналлаз махсус агрегатар галай 4 тракторди самар элкъвей чIехи кIватIара (рулонра) кьазва. Самар, энгел тавуна, «Шур дере» учас­токда ва Кьулан СтIалрин мулкунал агрохолдингдин мал-къаради кьуьд акъудзавай чкайрал хутахзава, ви­ликамаз эцигнавай кьурарик харадиз язава.

Къазиагьмед Къазиагьмедова, Абрек Шерифова ва Къазиагьмед Абумислимова чун самарикай рулонар кьунвай никIеризни тухвана­. Абрек Шерифова чаз лагьайвал, самарин са кIватIунай (рулондай) 130 килограмм къвезва­. И къайдада кIватIнавай самар никIерай хутахун, кьурарик харайра эцигун ва мал-къарадиз тIунариз вегьинни регьят я. Икьван чIавалди 50 тонн самар кIватI хъувунва.

Гад агудунихъ галаз сад хьиз, агрохолдингда къведай йисан бегьердин къайгъуни виликамаз ийизва. ИкI, техилар ва самар кIватI хъувур никIера гуьгъуьналлаз цанар цазва. И кардал гужлу «Кировец» трактор машгъул я. Ада гьар юкъуз 10-12 гектарда цанар цазва. Са куьруь вахтунда и серенжемар 50 гектарда кьилиз акъуднава.

Абрек Шерифова лагьайвал, къведай йисан бегьер патал агрохолдингда 700 гектарда кьван мух цада. Лагьана кIанда, «АлиЯК» ООО асул гьисабдай мал-къара хуьнал машгъул я. Мухни ана малариз ем патал цазва. Карханадихъ гьакIни са йисан ва гзаф йисарин векьин уьруьшар ава.

Икьван чIавалди агрохолдингда 4200 тонн силос ва 1800 тонн сенаж гьазурнава­, мал-къаради кьуьд акъуддай чкайрал хутахна, саламат авунва.

Агрохолдингда авайла, чна хуьруьн майишатдин ва суьрсетдин управленидин кьилин пешекаррихъ галаз санлай районда мал-къарадиз алафар гьазурунин­ кIвалахар кьиле физвай гьалдикай ихтилатар авуна. Чаз лагьайвал, икьван чIавалди районда, санлай къачурла, 26 000 тонн алафар (векьер, сенаж ва силос) гьазурнава. Идакай 20000 тонн КФХ-рал, ЛПХ-рал ва кьилдин ксарал ацалтзава. Гад агудунин кIвалахар «Новый путь» СПК-дин 65 гектар никIерани кьиле физва.

Мал-къарадиз алафар гьазурунал кьилдин ксарин куьмекчи майишатарни машгъул я. Абуру векьер уьруьшрай, багъларин жергейрин арайрай, чIурухъан чкайрай язава. ДаркIуш-Къазмайрин, ЦIийи Макьарин, Эминхуьруьн, Ге­рейханован хуьруьн поселенийра, Кьулан СтIалрин калун учас­токда ЛПХ-ри векьер яна, туьквера кьуна, мал-къаради кьуьд акъуддай чкайрал хутахна саки акьалтIарнава.

Виликан йисарилай тафаватлу яз, эхиримжи вахтара районда векьер дергесралди ваъ, махсус агрегатар галай тракторралди, бензин цадай алатралди язава.

Ягъай кьуранвай векьер туьквера кьунал районда пресс-под­борщикар галай 20-дав агакьна тракторар машгъул я. Абурун чIе­хи пай кьилдин ксаринбур я.

УСХиП-дин кьилин пешекар Гьамидин Абдулкъафарова алава­ хъувурвал, авай мал-къарадин кьа­дардиз килигайла, районда 20 000 тонн алаф гьазурунин лазимвал ава. Чун инанмиш хьайивал, алай йисуз районда гьам техилар, гьамни алафар булдаказ ава.

Квез къуватар хьурай, гатун кIва­лахрал машгъул зегьметчияр!

Хазран Кьасумов