Мегьарамдхуьруьн районда зулун­ магьсулрин бегьер кIватI хъувунин кIва­лахар кьиле тухузва. Азадогълийрин администрацияди хабар гузвайвал, тежри­бадин «Гъугъванрин» станциядин 85 гектардин майдандай техилдин бегьер кӀватӀ хъийизва. Са гектардин бегьерлу­вал 25 центнердиз барабар яз, майишат­ди, санлай къачурла, 200 тонндилай гзаф техил кIватI хъувун фикирда кьунва­.

Алай вахтунда, республикадин амай мулкара хьиз, Мегьарамдхуьруьн­ райондани лежберри зулун магьсулрин бегьер вахчузва. РД-дин хуьруьн майишатдин ва недай суьрсетдин министерстводи хабар гузвайвал, къенин­ йикъалди ина 20,8 агъзур гектарда кIва­лахар кьилиз акъуднава.

Вири санлай и сезонда хуьруьн майишатдин суьрсет гьасилзавайбуру 80 000 гектардилай виниз майданрай зулун магьсулрин бегьер кӀватӀ хъувун лазим я, хабар гузва идаради. Лагьана кIанда хьи, техилдин бегьер кIватIунин жигьетдай кIвенкIвечи чкадал Хасавюрт (19,5 агъзур га), Къизляр (7,5 агъзур га), Ногъай (тахминан 10 агъзур га) ва Къарабудахкент (9,5 га) районар ала.

РД-дин хуьруьн мйишатдин ва недай суьрсетдин министрдин заместитель Шарип Шарипова хабар гайивал­, 2026-йисуз техилдин магьсулар кIва­тIун патал никIера кьиле тухузвай кIва­лахрал 400-далай гзаф комбайнар, гьакIни маса регионрай алава техника желбда. Инал къейд ийин хьи, Дагъус­тандин лежберар, адет яз, зулун магьсулар кIватIунив Россиядин мулкунал сифтебур яз эгечIзава.

Жасмина Саидова