Дагъустанда республикадин регьбер Фёдор Щукинан теклифдалди «Команда Дагестана» лишандик кваз цIийи программа кардик кутунва. Лагьана кIанда, адаз ухшар авай проектар регионда идалайни виликни – Р.Абдулатипова, В.Васильева, С.Меликова регьбервал гузвай йисарани – арадал гъанай. ТIварар гьар жуьрединбур ятIани, абурун макьсад сад я: дагъустанвийрин арадай алакьунар, чирвилер авайбур винел акъудун ва абур гьукумдин органриз желб авун.

Гьакъикъатдани, Дагъустандин чи йикъарин несилрин арада чпихъ яшайишдин жуьреба-жуьре хилерай дерин чирвилер, агалкьунар, тешкилатчивилин алакьунар авай пешекарар тIимил авач. Гзафбуру республикадилай къецепата чпин пешейрай зегьмет чIугвазва. «Команда Дагестана» хьтин программайри абур санал кIватI хъийидай, абурукай виридалайни бажарагълубур хкягъдай ва кьилинди абуруз хайи республика вилик тухун патал кIвалахдай мумкинвал гуда.

Гзаф экспертри, журналистри, политологри къейдзава: Дагъустандихъ чкадин гьукумдин органра жавабдар къуллугъар кьиле тухудай кадрияр (пешекарар) бес-кьадар ава. Абурукай бязибуру фикирзавайвал, чкадин халкьарин къанажагъдин, къилихдин, адетрин гъавурда бегьем авачир паталай гъизвай пешекардилай (ам гьикьван чирвал авайди яз хьайитIани), жуван арадай хкягъун ва жавабдар къуллугъни гьадал ихтибарун хъсан я. Амма жувандини чрайди, гъилел михьиди, чирвал авайди хьун герек я.

Фёдор Щукина къейд авурвал, «Команда Дагестана» программади ана иштиракзавайбур «жуванбурузни» «чарабуруз» пайдач, сифте нубатда алакьунриз къимет гуда. Лайихлу ксар лайихлу дережайривни агакьда. Вири иштиракчияр патал къайдаярни сад я. «Команда Дагестана» программада иштиракун патал вуч авун герек ятIа, проектдин официальный сайтдай кIелиз жеда.

Республикадин регьбердин гафаралди, крар идара ийидай къуллугърал ксар тайинардай чIавуз «Команда Дагестана» программадин нетижада арадал къведай кадрийрин резервда гьатдай дагъустанвияр сифте чкадал жеда. Гьар садахъ галаз Фёдор Щукин рахадайвал я.

Са гафуналди, нихъ алакьунар, къастар, республика вилик тухудай ниятар аватIа, «Команда Дагестана» программадик экечI. Агалкьунар хьурай!

Мегьамед Ибрагьимов, кьилин редактор