Малар агакьарнава
РД-дин хуьруьн майишатдин ва недай суьрсетдин министерстводи хабар гузвайвал, и йикъара Дагъустан Республикадиз, мергьяматлувилин нубатдин куьмек яз, гьайванрин пуд лагьай партия – 64 къарамал агакьарна. Ацадай калер, данаяр ва яцар Ростовдин областдин ва Ставрополдин крайдин лежберри гьакъисуздаказ ганва.
Министерстводин пресс-къуллугъди хабар гайивал, малар РФ-дин хуьруьн майишатдин министерстводи кьиле тухузвай мергьяматлувилин чӀехи серенжемдин пай яз агакьарнава. Ам чпин майишатриз тIебиатдин бедбахтвили еке зиянар гайи фермерриз куьмек гунихъ элкъуьрнава.
Хабар гузвайвал, республикадиз гъанвай малар марфари ва булдаказ къвайи живери еке зиянар ганвай Хасавюрт ва Лак районрин лежберрин арада пайда.
«Мергьяматлувилин куьмек кьабулунин ва паюнин гьерекат Дагъустан Республикадин хуьруьн майишатдин ва суьрсетдин министрдин везифаяр вахтуналди тамамарзавай Шамил Рамазанован гуьзчивилик ква. Министерстводи, куьмек зарар хьанвай гьар са гьаятдив фад агакьдайвал, лазим тир вири серенжемар кьабулзава», – къейдзава идаради.
РикIел хкин, голштинский жинсинин калерин сад лагьай десте (30 кал) 20-июндиз Хасавюрт райондин Адильотар хуьруьз гъанай. Саратовдин областдин жинсинин маларин «Трудовой» заводдай тир и калери суткада 40 литрдилай гзаф нек гузва. 1200 километрдилай яргъи рехъ атIудайла, калер, ацун патал Волгограддин областда акъвазарнай.
Санлай къачурла, РФ-дин хуьруьн майишатдин министерстводин теклифдалди Саратовдин, Волгограддин, Ростовдин областри ва Ставрополдин крайди Дагъустандин лежберриз гьакъисуздаказ тахминан 140 къарамал гудайвал я.
Малар чкайрив агакьайдалай кьулухъ еке фикир биохатасузвилин месэлайризни гуда. Хасавюрт райондин ветеринарный управленидин регьбер Мурад Хизриева хабар гайивал, республикадиз гъанвай маларин нехир веткъуллугъдин кьетIен гуьзчивилик кутазва. Пешекарри карантиндин ва азаррин вилик пад кьадай лазим тир вири серенжемар тухуда. ИкI хьайила, калер Дагъустандин чилив-гьавадив жезмай кьван фад ва хатасуздаказ вердиш жеда.