Алай вахтунда, виринра хьиз, Ахцегь райондани автотехникадин кьадар  артух хьанва. Махсус автостоянка (и карди райондин бюджетдиз пулни гъидай мумкинвал гудай) авачирвиляй гзафбуру чпин машинар гьинал хьайитIани акъвазарзава. Улакьар­ акъвазарун къадагъа тир бязи чкайрал лишанар эцигнаватIани, абур кваз кьазвач.

Мисал яз, Пенсийрин фондунин райотделенидин дараматдин вилик квай рекьин кьве патани улакьар акъвазарун къадагъа тирди къалурзавай лишанар аватIани (и дараматдин кьулухъ автотранспорт акъвазардай чка гала), гзаф вахтара инал хсуси машинар акъвазарзава. И чIуру карди гьам яхдиз физвайбур, гьамни автотехника патал четинвилер арадал гъизва.

Рекьерин гьерекат къайдаламишун патал эцигнавай махсус лишанриз табий тежезвайбуруз талукь яз ГИБДД-ди са жуьрединни серенжемар кьабул тавун тажуб жедай кар я. Са кьадар вахт идалай вилик райгазетда Ахцегьа цIийи муькъвел автотехника акъвазарзавайдакай критикадин материал чапнай, амма  са тIимил вахт арадай фейила, низамсуз бязи шоферри анал мад машинар акъвазариз эхгечIна.

Райцентрада къадагъа авунвай чкайрал улакьар акъвазарун  давам жезва. Автотранспортдин гьерекат къайдаламишунин  кардал ГИБДД-ди яраб мус гуьзчивалдатIа?

Рагьидин Эминов