Мегьарамдхуьруьн райондай ашукьрин машгьур хизандай тир Айдун Мегьамедова, жуьреба-жуьре сегьнейра вичин устадвал къалуруналди, гъалибвилер къазанмишуналди, сагърай вич, чун мукьвал-мукьвал шадарзава, муштулухар чна газетдани гузва. ИкI, алай вацран эвелра Къиргъи­зияда кьиле фейи адетдин музыкадин международный «Кочмондор санаты» («Наследие кочевников») фестивалда Айдун Мегьамедов 1-дережадин лауреатвилин дипломдиз лайихлу хьана. Нубатдин агалкьун чна адаз рикIин сидкьидай мубаракзава. Къуй дуьнья ислягь хьурай! Манийрин ванни сегьнейрилай кими тахьурай!

Къейд авун лазим я хьи, курортрин гуьрчег шегьер тир Чолпан-Атада, Чингиз Айтматован тIварунихъ галай медениятдин «Рух Ордо» центрада, кьиле фейи международный фестиваль «Кочмондор санаты» куьчери гьалда яшамиш жезвай ксарин Виридуьньядин VI къугъунрин сергьятра аваз тешкилнавай. Мярекатди дуьньядин 26 уьлкведай, гьа гьисабдай яз Латиндин Америкадай, Африкадай, Азиядай, Сибирдай, Дальний Востокдай, Кавказдай тир адетдин культура хуьзвай ксар - манидарар, алимар ва ахтармишунардайбур санал кIватIнавай.

Дагъустандин культу­ра­дин министерстводин Рес­публика­дин халкьдин яратмишунрин кIвалин (РДНТ) теклифдалди-къа­рардалди фестивалда РД-дин культурадин лайихлу къуллугъчи, «Дагъустандин руьгь» гос­премиядин лауреат, ашукьрин пуд лагьай сихил­дин векил Айдун Мегьамедова иштиракна. Междуна­родный конкурсда мани тамамарунин виниз тир устадвал ва лезги ашукьрин адетрин девлетлувал къалуруналди, «Сказительное искусство» хи­ляй чи ватанэгьли 1-чкадиз лайихлу хьана. Айдун Мегьамедова чи ашукьрин адетар – чпе шиират, вокалдин тамамарун, хабар гун ва алатдин музыка сад-садав тамамвилелди кьунвайвал – вичин музыкадин уьмуьрдин кьилин «юлдаш» чуьнгуьрдалди устадвилелди къалурна. Мегьамедоврин хизанда чIехи бубайрилай ирс яз агакьнавай гьунарар, алакьунар, устадвал. Фестивалдин макьсадни гьа идахъ, садалай садал гьалтзавай ирс хуьнихъ, ам къведай несилрал­ агакьарунихъ хъсандиз кьунва. Международный сегьнеда ашукьди фольклордин гьакI са нумра ваъ, вич шаирни, манидар­ни, музыкантни, халкьдин сивин яратмишунар хуьзвай касни яз, жуван халкьдин еке устадвал, ирсинин деринвал, тамамвал къалурна.

РикIел хкин, Айдун Мегьамедова июлдиз Красноярскдин крайдин Шушенское поселокда, РФ-дин МИД-ди куьмек гуналди, кьиле тухвай, Россиядин халкьарин садвилин йисан прог­раммадик акатнавай халкьдин манийрин ва гъилин сеняткарвилерин «Мир Сибири» международный XXII фестивалдани иштиракнай. Ана уьлкведин 13 региондай тир – Сахалинди­лай­ Дагъустандал къведалди – саки 200 иштиракчиди чпин ус­тадвал къалурнай. Мярекатдиз тамашиз 83 агъзур кас атанвай­. Абурун арада Белоруссиядай, Индиядай, Къиргъизиядай, Эрменистандай, Колумбиядай ва Китайдай тир мугьманарни­­ авай. Артистри - кьилин сегьнеда, гъилин сеняткарвилин ус­тад­ри «Шушенское» музей-заповедникда чпин устадвал къалурнай. Фес­тивалдин конкурсдин программада Россиядин 16 региондай тир 43 касди чпин бажарагълувал тестикьарнай.­ Абурун арада ашукь Айдунни авай. Гила хьиз, а чIавузни ам Дагъустандин культурадин министерстводин РДНТ-дин къарардалди рекье тунвай. Вич ихьтин ихтибардиз лайихлу тирди ада и конкурсдани вини дережада аваз субутнай ва лауреатвилин тIвар къазанмишнай.

Рагнеда  Рамалданова