Россельхознадзордин Дагъустан Республикада авай управленидин госинспекторри Россиядин мулкунал Азербайжан Республикадай 18,4 тонн таза шурван пIинияр гъунал къадагъа эцигна. И кардин себеб емишрилай карантиндик акатзавай зиянкар гьашарат жагъун я.
Идаради хабар гузвайвал, пар ам ракъурай уьлкведиз РФ-дин сергьятдин Дагъустанда авай участокдилай — “Ярагъ-Къазмаяр” пунктунилай элкъуьрна рахкурнава. Сергьятдилай гъизвай пар ахтармишайла, адалай карантиндик акатзавай гьашарат — рагъакIидай патан плодожорка жагъана.
Зиянкар гьашаратар квай суьрсет чи уьлкведиз гъиз алахъунай парцин иесидиз талукь яз протокол туькIуьрнава.
РагъакIидай патан плодожорка — им карантиндик акатзавай хаталу гьашарат я, Россиядин Федерациядин мулкунал ам кьитдиз гьалтзава. Ада емишар, жуьреба-жуьре культурайрин таза хилер тергзава.
Гьазурайди — Жасмина Саидова
