26-январдиз Ахцегь райбиб­лиотекадин залда яшлу диде, хуьруьн шаир  Асия  Рагьимова­дин “Дидедин весияр” ктабдин ­пре­зентация кьиле фена. Рагьи­моврин хизанда им еке шадвал хьана.

Ахцегь муниципалитетдин кьил Осман Абдулкеримован, райсобранидин депутатрин патай Асиядиз тебрикдин хуш келимаяр лугьуналди, мярекат райондин кьилин заместитель Алмас Шуаева ачухна.

ЦБ-дин кIелдайбурун залдин заведующий, РД-дин культу­радин ла­йихлу работник Гуьл­жа­гьан­ Гъаниевади къейд авурвал, Асият ваха гьеле­ 8-классда авай­ла шиирар кхьизвай, абур яваш-яваш райондин “ЦIийи дуь­нья”, республикадин “Ком­му­­нист” газетриз акъат­на. ИкI, ри­­кIин къеняй къвез хьайи цIа­рарикай-шииррикай ибарат вижевай ктаб арадал ­атана.

Асия дидедиз ктаб ва юбилей­ тебрикиз, гзафбур рахана: РД-дин лайихлу муаллим Гь.Гьа­жи­ев,  культурадин управленидин начальник, РД-дин культурадин лайихлу работник Ширинбег Мусаев, Асиятан хва, РД-дин культурадин лайихлу работник Абдукерим Рагьимов,  РД-дин культурадин лайихлу ра­ботник Гьемдуллагь Бабаев, муаллим Айида Рашидова, автордин багърияр тир Шакуф Межидов, ЦIаруба Гашаров, рушар — Мафи, Марина, Фатима, Сабина, свас Светлана, библиотекадин работникар Кагьраба Ильясова, Мая Нурмегьаме­дова, Марита Давудова, Ахцегьрин 1-нум­радин школа­дин­ муаллим Жамиля Саидова ва масабур. Абуру Асия Эмира­гъа­евна­дин инсанвилинни зегьметкешвилин къени къилихрикай ва акьалтзавай несил дуьз тербияламишунин карда ктабдин лайихлувилерикай cуьгь­бетна, Асиядиз бахшнавай чпин шиирар кIелна.

Инал гьуьрметлу дидедив райадминистрациядин ва масабурун патай ганвай шабагьар, савкьатарни вахкана.

Мярекатдин музыкадин паюна РДК-дин гьевескар артистар тир Рубаба Къурбановади, Зуль­фия Гъаниевади, Таира Мегьарамовади, А.Рагьимовадин хтул Мухаммада ва масабуру тамамарай маниярни кIелай шиирар виридаз бегенмиш хьана.

Дашдемир Шерифалиев