СтIал Сулейманан райондин пресс-къуллугъди хабар гузвайвал, и йикъара районда футболдай гьар йисуз кьиле тухун хъсан адетдиз элкъвенвай спортдин серенжем – А. Жарулаеван экуь къаматдиз бахшнавай 26-турнирдин финалдин къугъунар ва ам агалуниз талукьарнавай шад мярекат – кьиле фена. Райондин спортдин, туризмдин ва жегьилрин крарин рекьяй комитетдин куьмекни галаз Жарулаеврин хизанди тешкилнавай спортдин и серенжемда алай йисуз Кьиблепатан Дагъустандин шегьеррайни районрай тир 12 командади иштиракна.

Адет хьанвайвал, турнирдин финалдин­ къугъунар Агъа СтIалрин хуьре, А.Н. Жа­рулаеван тIварунихъ галай стадиондал­, фут­бол къугъунин вири къайдайрал амал авуналди, кьиле тухвана. Къугъун­риз тама­шиз гзаф кьадар мугьманар, гьа гьисаб­дай яз машгьур спортсменарни вилик-кьилик квай ксар, футболдал рикI алайбур атанвай. Футбо­листри кIватI хьанвайбуруз­ къизгъин ва яргъалди рикIел аламукь­дай­ итижлу­ легьзеяр багъишна. Нетижа­­да СтIал Сулейманан райондин Агъа СтIал­-Къаз­майрин хуьряй тир «Кюре-Улей» – 1, «Агъа СтIал» – 2 ва Кьасумхуьруьн «Кюре» командаяр 3-чкайриз лайихлу хьана.

Гъалиб хьайибурувни призёррив кубокар, дипломар ва пулдин пишкешар вахкана. Командайрилай гъейри, турнирда хъсандиз къугъвай кьилдин футболис­тарни къейдна.

Къугъунар акьалтIуниз талукьарнавай шад мярекатдал райондин кьил Саид Темирханова тебрикдин чими келимаяр лагьана: «Гьуьрметлу футболистар, болельщикар! А.Н. Жарулаеван экуь къаматдиз бахшнавай турнирдин финалдин къугъунар акьалтIна. Агъа СтIалрин майдандал чаз спортдин халис сувар акуна. Спортдин шад и вакъиа за квез виридаз тебрикзава! Галаз-галаз 26 йисуз турнирди Дагъус­тандай викIегь командаяр кIватIзава. ЦIи  12 командади чпин устадвал къалурна. Къейд авун лазим я хьи, къугъунрин дережа йисалай-суз хкаж жезва. ЦIи вири пьедестал райондин командайри кьуни чи руьгь мадни хкажзава. Ида районэгьлийрихъ спортдин рекьяй бажарагъ авайди къалурзава. Футболди кьилин кар – командада аваз кIвалахиз, гьужумдин хура акъвазиз ва саналди гъалибвал къазанмишиз чалишмиш жез чирзава. Санлай спортди къилих лигимарзава, руьгь хкажзава». Райондин кьили турнирдин иштиракчийрихъни тамашачийрихъ, гьар са районэгьлидихъ мягькем сагъламвал, еке агалкьунар хьун алхишна, райондин ва республикадин тIвар мадни гьуьндуьр дережадиз хкажуниз эвер гана.

Рагнеда Рамалданова