Гила «эко» гьакIан ичIи гаф туш: Россия­да метягь маркировка авун (вичиз тешпигь авачир рекъемрин кIватIалдалди лишанламишун) патал ГОСТ арадал гъанва.

Къацу пешинин шикил, «bio» кхьинар алаз хьун, гьакIни суьрсет тIебииди тирдахъ инанмишариз алахъун – гьакъикъатда вири и тафаватлувилерин бинеда адетдин суьрсет авай, яни инсанар алцурарзавай дуьшуьшар тIимил туш. Идалай вилик экологиядин жигьетдай метягьдин михьивал ахтармишун саки мумкин кар тушир.

Гила вири дегиш хьанва: Россияда­ экомаркировкадиз талукь яз милли цIийи стандарт арадал гъанва. Ам Роскачест­води ва Экологиядин союзди санал туь­кIуьрнава. До­кументдин бинеда адетдин метягь «къацу»­ авунихъ галаз женг чIугун ава ва ада и ва я маса тереф ачухдаказ къалур тийизвай ва талукь тир документралди тестикьар тавунвай «экологиядин» келимаяр-ли­шанар иш­­лемишун къадагъа ийизва.

Стандартдин асул терефар

СМИ-ри хабар гузвайвал, цIийи ГОСТ-дин асул терефрик суьрсет дуьзди ва гьа­къикъиди, гьакIни арзаяр субутариз жедайбур хьуниз ийизвай кIеви истемишунар­ акатзава. Эгер документралди ачухдаказ ва алцифдаказ тестикьарнавачиз хьайитIа­, метягь акъудзавайбуруз «экологиядин ­рекьяй ми­хьиди», «къацуди», «био» ва я «эко» гафар ишлемишдай ихтияр амач. Суьрсетдин «михьивилин» гьа­къиндай ­ийизвай гьихьтин хьайитIани арзаяр гила аслу тушир экспертизайрин нетижайралди ва я сертификат­ралди тестикьарун чарасуз я.

Стандартди гекъигун патал ишлемишза­вай арзаяр (месела, «экологиядин жигьетдай амайбурулай 20 процентдин гзаф михьи я» ва икI мад) къайдада твазва ва муьш­терияр патал куьмекдин вири делилар ачухаруниз мажбурзава. Экологиядин мес­эла­дихъ галаз алакъалу авуниз гила метягь маса гун патал ишлемишзавай тезисрикай садаз хьиз ваъ, вири патарихъай алцумиз жедай кIвалахдин нетижадиз хьиз килигзава.

Базар ва бизнес патал важиблувал

ГОСТ-дин бинеда адан истемишунар гуьгьуьллудаказ тамамарун аватIани, ада бизнес патал методикадин сад тир бине арадал гъизва. МасакIа лагьайтIа, «экологиядин жигьетдай михьивал» тестикьарзавай документ къачун гуьгьуьллувилелди ийизвай кар я, амма и истемишунал амал ийизвайбур патал адакай ихтибардин паспорт, ахтармишдайбурун истемишунри­кай хуьдай такьат жеда.

Документди компанийриз экологиядин терефдихъ галаз­ алакъаяр дуьздаказ туькIуьриз, вахт-вах­тунда арадал къвезвай хаталувилер агъу­зариз ва государстводин органрихъ галаз ачухдаказ кIвалахиз куьмек гузва. Базарда лагьайтIа, стандартди муьштерияр хуьнин везифаяр тамамарзава, къалп «михьивилин» рекламадин таъсирдик кваз алцурарунин хаталувал тIимиларуналди.