Адет яз, аял хьайила, багърийри, мукь­ва-кьилийри «Вун бахтлу хьурай, Аллагьди 100 йисан уьмуьр гурай!» лугьуз алхишарда­. И «агь» Кьасумхуьрелай тир Ярагьмедова Гьавизар Жарулаевнадихъ галукьна: чина­ бере­катдин нур авай, сивел хъвер алай мегьрибан дишегьлиди и йикъара асир­дин юбилей къейдна. Веледрихъ, хтулрихъ, птулрихъ, багърийрихъ галаз санал Гьавизар дидедиз виш йисан юбилей СтIал Сулейманан райондин кьил Саид Мусиновичани мубаракна, адаз цуьквер, рикIел аламукьдай савкьатар пишкешна (шикилда).

– Гьавизар Жарулаевнадин уьмуьр чи уьл­кведин, республикадин ва райондин тарихдин къакъат тийир пай, камаллу дишегьли вич чан алай тарих, гзаф вакъиайрин шагьид я, – лагьана райондин кьил Саид Темирханова. – Ада яргъал йисара производствода гьакъисагъвилелди зегьмет чIугуна, баркаллу уьмуьр­ кечирмишна. ЧIехи, гьуьрметлу, низамлу хизан арадал гъун – им Гьавизар Жарулаевнадин виридалайни чIехи игитвал я. Ихьтин инсанри чи халкьдин виниз тир руьгьдин шикил къалурзава. Адахъ къуй сагъламвал, руьгьдин мягькемвал, яргъал йисарин уьмуьр хьурай!

Гьавизар Жарулаевна чазни фадлай ва мукьувай таниш я. Яшлу дидедин чинай чаз адан уьмуьрдин еришар, рикIин керчеквал аквазва. Гьакъикъатдани, яшлу инсан алемдин тарих, кIвалин-хуьруьн абур, девлет я.

Гь.Ж. Ярагьмедова 1926-йисуз Ивиг­рин хуьре дидедиз хьана. Ада школада 4-классдал кьван кIелна, мад кIелун давамардай мумкинвал рушаз хьанач.

– Дишегьли веледдин кIелун куьз я, адакай я хуьруьн совет, я колхоздин гьаким жедач кьван, – мукьвал-мукьвал тик­рардай заз дидедини бубади, – чина хъвер аваз ихтилатзава Гьавизар дидеди. – Гьавиляй зун, аял кьил яз, колхозда кIва­лахуниз мажбур хьана. Гьа зи яшара авай гадаяр, рушар мадни авай.

Ватандин ЧIехи дяведин йисарни Гьавизар Жарулаевнадин рикIел хъсандиз алама. Ада суьгьбет авурвал, а чIавуз хуьре Максим Горькийдин тIварунихъ галай колхоз кардик квай. Колхозчияр магьсулдарвилел ва малдарвилел машгъул жезвай. Картуфар ва маса суьрсет гьасилзавай. Дяведин йисара Ивиграл 50-далай виниз кIвалер алай. Хуьруьнвийри малар, лапагар, кIвалин къушар хуьзвай.

– Чи колхозди дяведин йисара ­фронтдиз куьмекар гузвай, – рикIел хкизва Гь. Ярагьмедовади. – Чи колхозчийриз­ И.В. Сталиналай чухсагъул малумарза­вай телеграммаярни хтанай. Председа­телди чарар кIелайла, колхозчийрик руьгь акатдай, абур фронтдиз мадни гзаф шейэр ракъуриз чалишмиш жедай.

Малум хьайивал, Гьавизар Жарула­евнади гатун зегьемвилиз, хъуьтIуьн къаяриз дурум­ гана, оборонадин сенге­рар туькIуьрунин, хан­да­кIар ягъунин кIва­лахра иштиракна. Дяведин йисара далу пата гьакъисагъвилелди зегьмет чIугунай адаз ДАССР-дин Верховный Советдин Президиумдин ва армиядин командованидин патай грамотаяр ганай.

Дяведин четин йисар алатна. 1950-йисуз Гьавизар Жарулаевнади ва Ватандин ЧIехи дяведин иштиракчи, агъаарагъви Ярагьмед Агъамалиевича чпин рикIер, сирер сад авуна, хизан кутуна.

Гьавизар Жарулаевнади чаз вичин уьмуьрдин юлдашдин зегьметдин ва дяведин рекьерикайни суьгьбет авуна, адан хейлин документар чи вилик эцигна.

Малум хьайивал, Ярагьмед Ярагьмедоваз­ 1941-йисан 15-июндиз Кьасумхуьруьн РВК-ди армиядин жергейриз эвер гана. Ада фронтда мо­тострелковый 20 полкунин, 105-погранотряддин­, 55-полку­нин составра аваз женгера иштиракна­. Ам Берлиндиз кьван фена. Сержант Ярагь­ме­дов 1946-йисан 24-декабрдиз хуьруьз хтана.

– Ярагьмедахъ галаз чун, арада гьуьр­мет, кIанивал аваз, тамам 36 йисуз­ санал яшамиш хьана, – рикIел хкизва­ Гьавизар Жарулаевна­ди. – Жуьреба-жуь­ре идарайра кIвалахай, 26 йисуз райфин­отделда инспекторвал авур Ярагьмед 1986-йисуз рагьметдиз фена.

Зегьметдин къадир фад чир хьайи Гьавизар Жарулаевнади 50 йисалай виниз колхозда, райондин центральный больницада санитарка яз, совхозда ва Кьасумхуьруьн консервиярдай заводда рабочий яз кIвалахна.

Гьавизар ва Ярагьмед Ярагьмедоври 8 аялдиз уьмуьр гана. Ярагьмедоврин хизандай СВО-дин иштиракчиярни акъатна.

Гьавизар Жарулаевнадиз зегьметдал рикI алай ферли веледри, сусари, 24 хтулди ва 30-далай виниз птулри рикIин шадвал, пакадин йикъахъ инанмишвал гузва.

Асирдин юбилей рикIин сидкьидай мубарак авуналди, чаз Гьавизар Жарулаевнадихъ мягькем сагъламвал, веледрикай, хтулрикайни птулрикай рикIин динжвал хьун кIанзава.

Хазран Кьасумов