6-мартдиз Дагъустандин Кьилин везифаяр вахтуналди тамамарзавай Владимир Васильева республикадиз атанвай миллетрин крарин рекьяй Федеральный агентстводин регьбер Игорь Баринахъ галаз гуьруьш кьиле тухвана.
Игорь Барина республикадин Кьилиз Махачкъалада кьиле тухвай спортдин «180318:Выбор чемпионов!» серенжемдин важиблувал къейдна.
«Дагъустан неинки са баркаллу спортсменралди машгьур я. Республикадай илимдин ва медениятдин тIвар-ван авай векиларни акъатнава. Зи фикирдалди, спорт, илим ва меденият Дагъустандин гележег я. Кьилди куь ва вири уьлкведин алахъхунралди Дагъустан экуь гележегди гуьзетзава», — лагьана И.Баринова.
Владимир Васильеван гафаралди, ихьтин гележег патал санал кIвалахна кIанзава. «Нетижа сад хьана кIанда. Адакай датIана уьлкведин Президентдини лугьузва: инсанриз куьмек гун, шартIар арадал гъун», — алава хъувуна республикадин Кьили.
И.Баринова рикIел хкайвал, Дагъустан уьлкведа виридалайни гзаф миллетар санал яшамиш жезвай регион я.
«Кеферпатан Кавказда, санлай къачурла, миллетрин арада къалмакъалар, хци месэлаяр хьун лазим туш. Абур анжах гьукумди «алциф тавунвай» къарарар кьабулайла арадал къвезва. Чебни, асул гьисабдай, экономикадихъ, чилерихъ галаз алакъалу месэлаяр. Гьукум ачухди тирла, халкьдин арада жуьреба-жуьре гъулгъулаяр арадал къведач. Гьар са къарар кьабулдайла, гьахълувал фикирда кьуна кIанда»
«Заз гзаф кхьизва, зани гзаф кIелзава ва ван къвезва, Дагъустандин агьалияр патал кьилинди гьахълувал я. Чил — халкьдиз! Им чи гьамиша гьахълудаказ, ачухдаказ амална кIанзавай лозунг я», — тестикьар хъувуна Владимир Васильева.
***
И юкъуз Владимир Васильев ватанпересвилин «ПроРФ» гьерекатдин векилрихъ, Госдумадин депутатар тир Елена Бондаренкодихъ, Зураб Макиевахъ, Бувайсар Сайтиевахъ ва тайский боксдай спортдин лайихлу мастер Артем Левинахъ галазни гуьруьшмиш хьана.
Гьерекатдин векилар Дагъустандиз мугьман хьунин нетижаяр кьадайла, Игорь Баринова къейд авурвал, РФ-дин Президент хкядай сечкийриз бахшнавай спортдин зарядкада республикадин меркездин агьалийри ва мугьманри активнидаказ иштиракна. Абурун кьадар 3000-далай алатнавай.
«Проектдин кьилин макьсад РФ-дин Президент хкядай сечкийрин вилик жегьилар уяхарун я. Спортдин и серенжем ва студентрихъ галаз кьиле тухвай гуьруьш 18-мартдиз жегьилар сечкийриз атуниз эвер гунихъ элкъуьрнавай. Зи фикирдалди, сечкийрин вахтунда Дагъустан чешне яз къалурдай регионрин арада жеда», — лагьана Игорь Баринова.
Владимир Васильева мугьманриз республикадиз мугьман хьунай сагърай лагьана ва абуру жегьил дагъустанвияр ватанпересвилин руьгьдаллаз тербияламишуник лайихлу пай кутунвайди къейдна.
РД-дин Кьилин ва Гьукуматдин Администрациядин пресс-къуллугъ
