“Лезги газетдин” редакциядиз Кьасумхуьрелай тир муаллимрилай агъадихъ галай чар атана.

“Гьуьрметлу “Лезги газетдин” редакция! Куьн вири сагъ­рай! Шадвилер гзаф  хьурай! Редакцияда зегьмет чIуг­вазвай вири дишегьлийриз 8-Мартдин суварни мубаракрай! Чун газетдал дамахзавай, ам датIана кхьизвай, кIел­за­вай ксар я. Гьуьрметлубур, чахъ са шумуд суал ава. Аялар хазвай амай дидейризни чир жедайвал, чаз куьне  а суалриз га­зетдин чинилай жавабар ганайтIа,  кIанзавай. Чкайрал ха­бар кьурла, лазим тир идарайрай дуьз жавабар гузвач. Куь­не и кIвалах кьилиз акъудуник чна кIевелай умуд кутазва­.

Чаз чир хьана кIанзава.

— Аял хадалди ва аял хайидалай кьулухъ шумуд югъ декретдин отпуск ава?

— 2018-йисан 1-январдилай, пуд лагьай аял хайила, са сеферда гудай пулдин такьатрин кьадар гьикьван я?

— Аялдихъ гелкъуьнай гузвай отпускдин вахт шумуд варз ава ва вацра гьикьван пул гун лазим я?

— Пуд ва адалай виниз аялар хайи дидейриз гьукуматдин патай мад са гьихьтин ятIани куьмек авани?

Гьуьрметлубур, чна гзаф тIалабзава, гьакъикъат чирна, газетдин чинилай чав жаваб агакьарун. Им куь патай чаз еке савкьат жеда. Квехъ кIвалахда еке агалкьунар хьурай!

Гьуьрметдивди, дидеяр тир Р.Мегьамедова ва О.Алиева”.

Чун Россиядин Федарациядин Социальный Страхованидин Фондунин (ФСС) Дагъустан Республикада авай отделенидиз фена ва анин общественностдихъ галаз алакъа хуьдай дес­тедин кьилин пешекар  Абдурагьим  Сулеймановавай  чи кIел­за­­вайбурун суалриз жабавар гун тIалабна.

Ингье чаз гайи жавабар.

— Аял хадалди ва аял хайидалай кьулухъ дишегьлидиз шумуд югъ декретдин отпуск ава?

— Санлай къачурла, кIвачел залан хьуниз ва аял хуниз талукь яз декретдин отпускрин (дородовой ва послеродовой) йи­къа­рин кьадар 140  я — аял хадалди 70, гьа икьванбурни-аял хайидалай кьулухъ. Амма аял четиндаказ хайи дуьшуьшра адан ди­дедиз алава яз 16 йикъан больничный чар гузва, отпускни гьа икьван йикъарин артух (86 югъ, вири санлай, 156 югъ) жезва.

Эгер кIвачел залан тир дишегьлиди санал кьвед ва адалай виниз аялар хун гуьзлемишзаваз хьайитIа, и дуьшуьшда адаз аял хадалди 84 ва аял хайидалай кьулухъни 110 югъ (вири санлай 194 югъ) отпуск гун лазим я.

— 2018-йисан 1-январдилай, пуд лагьай аял хайила, са сеферда гудай пулдин такьатрин кьадар гьикьванбур я?

— 2018-йисан январдин вацралай, аял хайила, са сеферда гузвай пособидин кьадарди (ханвай аял сад, кьвед, пуд ва ада­лай­ виниз хьунилай аслу тушиз) 16 350, 33 манат тешкилзава. ИкI, 1-февралдилай тир индексация гьисаба кьуналди -16 759, 09 манат.

— Аялдихъ гелкъуьнай гузвай отпускдин вахт гьикьван ава ва вацра гьикьван пул гун лазим я?

— Аялдихъ гелкъуьнай гузвай отпускдин вахт (сад, кьвед ва мад аялар хунилай аслу тушиз) 3 йис я.

Аялдихъ гелкъуьнай гьар вацра гузвай пул кIвачел залан хьуниз ва аял хуниз талукь яз декретдин отпускдин йикъар куьтягь хьайила тайинарда. И пул лагьайтIа, аялдин са йисни зур тамам жедалди гуда. ИкI, алай йисуз, 2018-йисан 1-февралдилай тир индексация гьисаба кьуналди, аялдихъ гелкъуьнай гьар вацра гузвай пособидин кьадар ихьтинди я:

— сад лагьай аял хайила, — 3 142,33 (январдиз — 3065, 69) манат;

— кьвед ва адалай виниз аялар хайила, — 6284,65 (январдиз-6131,37) манат.

— Пуд ва адалай виниз аялар хайи дидейриз гьукуматдин патай мад са гьихьтин ятIани куьмек (соцпомощь) авани?

— Социальный Страхованидин Фондунин хиляй пуд ва адалай­ виниз аялар хайи дидейриз гузвай пулдин алава такьатар авач.

Рагнеда Рамалданова