Федерациядин Советди накь зегьметдин гьакъидин агъа кIанин кьадар артухарунин гьакъиндай закон кьабулна, адал асаслу яз МРОТ зегьметдиз къабил агьалийриз яшамиш хьуниз лазим агъа кIанин кьадардив агакьарда. ИкI, Россияда 1-майдилай МРОТ-ди вацра 11 агъзурни 163 манат тешкилда.
РикIел хкин, 2018-йисан 1-январдин делилралди, федеральный МРОТ-ди 9 агъзурни 489 манат тешкилзавай, регионра тафават аваз хьунни мумкин я. Дагъустанда ам федеральный МРОТ-диз барабар я. Гъавурда хьана кIанда хьи, кIвалахзавайда гъилиз къачузвай гьакъикъи мажиб МРОТ-дилай тIимил хьун мумкин я, гьикI хьи, НДФЛ кьадалди янавай мажибдилай гьисабзава.
Закондихъ галай документра къейднавайвал, бюджетдин хилен работникрин кIвалахдин гьакъи хкажуниз ийидай харжийри 2018-йисуз санлай 39,3 миллиард манат тешкилда, адакай федеральный госидарайрин работникриз — 7,5 ва муниципальный идарайрин — 31,8 миллиард.
Федерациядин Советдин кьил В.Матвиенкоди ам “Президентдин важиблу инициатива” я лагьана. Ада Россиядин финансрин министерстводиз МРОТ хкажуниз герек алава такьатар жезмай кьван фад къалуруниз эвер гана.
Чи мухбир
