Лезги халкьдихъ спортдин рекье кьакьан кукIушар муьтIуьгъарнавай кьегьалар пара ава. Фарид Асретович Девлетхановни гьабурукай сад я.
Спортдин “Жегьил Аждагьан” (“Молодой Дракон”) клуб арадал гъанвайди яз машгьур хьанвай чи ватанэгьлидин ери-бине Сулейман-Стальский райондин Пипер хуьряй я. Алай вахтунда ам Махачкъалада яшамиш жезва.
Фарид Девлетханов гъвечIи чIавалай спортдал рикI алаз чIехи хьана. РикIевай къастуни адаз еке гъалибвилер къачудай мумкинвилерни гана.
ИкI, Фарид Девлетханов панкратиондай ва грэпплингдай Урусатдин чемпион я. Домодедова шегьерда женгинин самбодай кьиле фейи уьлкведин чемпионатдин акъажунра лезги хци 3-чка кьуна. Са кьадар вахт арадай фейила Фаридахъ дуьньядин дережадин акъажунра иштиракдай мумкинвал хьана. Анапада кикбоксингдай кьиле фейи чемпионатда адакай дуьньядин Кубокдин сагьиб хьана.
ЦIийи агалкьунри руьгь кутазвай жегьил спортсмендин нубатдин гъалибвални дуьньядин дережадинди хьана. Фарида Италияда спортдин “mix-combat” жуьредай кьиле фейи дуьньядин чемпионатда 1-чка кьуна ва хайи Ватандиз чемпиондин чIул гваз хтана.
Са кьадар вахт арадай фейила, Фарид Девлетханова вичин къуватар ММА-дани ахтармишна. Тоскана шегьерда спортдин и жуьредай дуьньядин дережада аваз кьиле фейи акъажунра чи ватанэгьлидикай гимишдин медалдин сагьиб хьана.
Лагьана кIанда, 2016-2019-йисара ада каратэдай Дагъустандин жегьилрин хкягъай командадин кьилин тренердин везифаярни тамамарнай.
Спортдин майданра хьайи тIарвилер себеб яз, алай вахтунда Фарида акъажунра иштиракзавач. Ам исятда сиясатдал машгъул я: “Яблоко” партиядин член тир Фарид Девлетханова Махачкъала шегьердин депутатрин Собранидин депутатдин куьмекчи яз кIвалахзава.
Агьмед Магьмудов
