Анжах дяведиз талукь чкаяр

Россиядин кьушунри, мидядилай тафаватлу яз, анжах военный макьсадар авай чкаяр язава. Кьилди къачуртIа, военный базайриз, яракьрин гьамбарханайриз, военно-промышленный комплексриз ва кьушунар таъминарун патал ишлемишзавай энергетикадин объектриз ягъунар кьазва.

Россиядин оборона­дин­ министерстводи 5-ок­тябрдиз малумарай делилралди, СВО кьиле тухунив эгечIайдалай инихъ Россиядин Яракьлу Къуватри Украинадин 674 самолет ва 284 вертолет, зенитдин ракетайрин 672 комплекс, пилот галачиз лув гудай 252914 аппарат, 31130 танк ва дяведин маса машинар, РСЗО-дин 1784 машин, артиллериядин ва маса 36632 яракь, дяведин махсус 73658 автомашин тергна.

Гьужумдикди телеф хьана

6-октябрдиз ВСУ-ди беспилотникралди Подмосковьедал гьужумунин нетижада ислягь 2 агьали телеф хьана. «РИА Новости» чешмеди кхьизвайвал, идакай анин губернатор Андрей Воробьева хабар гана.

«Барыбинода (Домодедово) къутармишдай пешекарри чкIанвай хсуси кIвалин гьамбаррикай телеф хьанвай 71 йисан яшда авай итим хкуд хъувуна. И кIвале аваз хьайи дишегьлидин сагъламвилизни хасаратвилер хьана. ГьакIни Солнечногорский округдин Радумля поселокда 20 йисан яшда авай жегьил телеф хьайиди тестикь хьанва», – кхьенва А. Воробьева «Макс» мессенджерда.  

Региондин кьили тестикьарайвал, гьужумрин нетижада 9 касдал хирер хьана, абуруз лазим тир медицинадин куьмек гузва. Алава хъувурвал, ирид муниципалитетда хсуси 47 кIвализ зиян хьанва. 

И йикъан экуьнахъ Москвадин мэр Сергей Собянина хабар гайивал, алатай нянин чIавалай меркездихъ 600-далай виниз дронар атана, абур тергна. Воробьеван гафаралди, Подмосковьеда ПВО-дин ва РЭБ-дин такьатрин къуватралди 185 беспилотник тергна.

Кьушунар ракъурдай ният

Пакистанни Туьркия, гьужумдикай хуьнин рекьяй Меккадин икьрардин сергьятра аваз, Саудиядин Аравиядихъ галаз ана хатасузвал таъминарун патал военный къуватар и уьлкведин мулкарал рекье тунин меслятдал атана. Идакай «Интерфакс» чешмеди хабар гузва.

«Меккадин икьрардин стратегиядин рекьяй сиясатдин ва оборонадин комитетди умуми оборонадин жигьетдай мажбурнамаяр тадиз кьилиз акъудунин, военный къуватар ва такьатар гунин, гьакIни абур Саудиядин Аравияда фад-фад тайинарунин месэла эцигнава», – кхьенва Пакистандин МИД-дин сайтда эцигнавай уьлквейрин умуми малуматда.

Къейдзавайвал, икьрардин иштиракчияр тир гьар са уьл­кведин хатасузвал абурун коллективный хатасузвилин къакъудиз тежер паярикай я. Ихьтин малумат Эр-Риядда 5-октябрдиз кьиле фейи Пакистандин, Туьркиядин ва Саудиядин Аравиядин­ умуми заседанидин нетижайрай чапна. Меккадин икьрарди, кьилди къачуртIа, адан иштиракчияр тир уьлквейрикай садал гьужум авуртIа, вирида жаваб гун лазим жедайди къалурнава.

Хуситриз акси яз

Йемендин гьукумдарри хуситри кьунвай мулкар вахчунин­ макьсаддалди дяведин гегьенш серенжем кьиле тухуз кIанза­вайдакай хабар ганва. Идакай «Интерфакс» чешмеда кхьенва.

«Къе чна чи мулкар вахчун патал дяведин серенжем кьиле тухунив эгечIнавайди малумарзава», – лагьана Йемендин президентдин советдин председатель Р. Мугьаммед аль-Алимиди.

Къейд ийин, хуситри Йемендин хейлин мулкар гуьзчивилик кутунва, гьа жергедай яз уьлкведин меркезни, сигъдиз инсанар яшамиш жезвай маса шегьерарни. 

Хаталувал гьиссна

6-октябрдиз Румынияди гьавада хатадикай хабар гайи сигналдилай кьулухъ F-18 истребитель цавуз акъудна. Идакай «РИА Новости» чешмеди хабар гана.

Уьлкведин оборонадин министерстводин делилралди, къурху Румыниядинни Украинадин часпардал дронрин группа пайда хьунихъ галаз алакъалу я. Идалай вилик НАТО-ди, лап фад тагькимардай къурулуш кардик кутуналди, Румыниядин гьавадин бушлухрал гуьзчивал тухун мягькемарнай.

"ЛГ"