Дагъустан Республикадин Кьилин везифаяр вахтуналди тамамарзавай Фё­дор Щукина 6-октябрдиз инсанрин ихтиярар хуьнин рекьяй Россиядин Федерациядин Векил Яна Лантратовадихъ галаз гуьруьш кьиле тухвана. Абуру дагъустанвийрин ихтиярар хуьнин ва дяведин махсус серенжемдин иштиракчийриз куьмек гунин мес­элаяр веревирдна.

Гьялай кар алай месэлайрикай сад агьалийрин арзайрихъ галаз алакъалуди тир. Яна Лантратовади Фёдор Щуки­нав арзайриз талукь яз туькIуьрнавай таб­лица вахкана ва абуру саналди федеральный ва региондин дережада аваз агьалийриз алава куьмек гунин месэлаяр тайинарна.

РФ-дин омбудсмендин гафаралди,­ алай йисан 8 вацра федеральный Векилханадин аппаратдиз Дагъустандай 500-да­лай виниз арзаяр атана. Абурун­ саки са пай дяведин махсус серенжем­дин иш­тиракчийрин ва абурун хизанрин­ ихтия­рар хуьниз талукь тир. Кар алай­бурук сагъар хъувун, военно-вра­чеб­ный­ комиссияр, талукь  документар туь­кIуьрун, реабилитация ва аскеррин хизанар тайин­ чкайрал рекье тун ва ихьтин маса мес­элаяр акатзавай.

Яна Лантратовади лагьайвал, Векилханадин аппарат РФ-дин оборонадин министерстводихъ галаз санал  гел галачиз квахьайбур жагъурунин ва есирда гьатнавайбур дегишар хъувунин мес­элайрал машгъул жезва.

Алатай йисуз есирдай Дагъустандин 10 аскер ахкъудна. ЦIинин апрелдин вацра мадни са дагъустанви есирдай азадна.

«Дяведин махсус серенжемдин иштиракчийриз гьар са рекьяй куьмек гун Дагъустан Республика патал важиблу я. Ихьтин менфятлу кIвалах кьиле тухунай за квез икрамзава», – баян гана Лантратовадин суьгьбетдиз Фёдор Щукина­. Ада алава хъувурвал, дяведин махсус се­ренжемда  гзаф дагъустанвийри иштиракзава, абуру женгинин везифаяр ­кье­гьалвилелди тамамарзава. Гуьгьуьл­лу­даказ СВО-диз фенвай уьтквем рухвайрикай 20 касдиз РФ-дин Игит лагьай тIвар ганва.

Дагъустанвийрин арзайрин 30 процент яшайишдин ва экономикадин рекьяй ихтиярар хуьнихъ галаз алакъа­лу тир. ЧIехи пай агьалийрик эме­ннидин, кIва­лерин, яшайишдин жигьетдай таъминарунин ва медицинадин рекьяй куьмек гунин меэлайри секинсузвал кутазва. Векилханадин кIвалахдин кар алай хилерик тIебиатдин бедбахтвилери зиянар ганвайбуруз куьмек гунни акатзава.

Федеральный омбудсменди инсанрин ихтиярар хуьнин рекьяй региондин­ векилди тухузвай дуьзгуьн кIвалах къейд­на. Адан алахъунар себеб яз 2,5 агъзур агьалидин ихтиярар чкадал хкана.­

«Республикада гражданвилин лап къуватлу общество ава», – къейдна Яна Лантратовади.

Яна Лантратовади инсанрин ихтия­рар хуьнин рекьяй Дагъустан Респуб­ли­када авай Векил Запир Алхасовахъ галаз санал агьалияр кьабулайдакай суьгьбетна. Инсанрихъ жуьреба-жуьре дердияр авай. Абурук тади гьалда гьялна кIанзавайбурни квай. Агьалияр кьабулунин карда региондин гьукумдин органрин векилрини иштиракна. Ида агьалийрин арзаяр гъиле-гъил аваз гьялдай мумкинвал арадал гъизва.

Федеральный омбудсменди Фёдор Щу­киназ кьиле тухвай суьгьбетдай ва санал кIвалахдай ашкъи хьунай сагърай­ лагьана. Агьалийрик секинсузвал кутазвай месэлаяр гьялун эвелимжи везифа я. Рес­публикадин агьалийрин ихтиярар хуьниз талукь кIвалах мадни жанлуди авуна кIанда. Яна Лантратовади гьакI инсанрин ихтиярар хуьдай волонтеррин гьерекат тешкилзавайдакайни малу­марна.

Фёдор Щукина къейдна хьи, агьалийрин гьарайдиз гьамиша гьай лугьуда, абурун са дердини фикир тагана тадач.

Республикадин Дуствилин кIвале Яна Лантратова региондин омбудсмендин къвалав гвай жегьилрин общественный советдихъ галазни гуьруьшмиш хьана. И мярекатда РД-дин Халкьдин Соб­ранидин Председатель Заур Аскендерова, РД-дин инсанрин ихтиярар хуьнин рекьяй векил Запир Алхасова иштиракна. Гуьруьш РД-дин омбудсмендин институтдин 20 йис тамам хьунихъ галаз алакъалу авунвай.

Яна Лантратовади суьгьбет авурвал, дяведин махсус серенжемдин 10 агъзурдалай виниз иштиракчияр ва абурун хизанар инсанрин ихтиярар хуьнин рекьяй РФ-дин Векилханадин аппаратдин гуьзчивилик ква. Дагъустандикай рахайтIа, Запир Алхасова аскеррин 310 хизандал гуьзчивал тухузва.

РД-дин Халкьдин Собранидин Председателди къейд авурвал, парламентди республикадин омбудсмендихъ галаз менфятлувилелди кIвалахзава. 

Хийир  Эмиров