Сентябрдин вацра пуд юкъуз давам­ хьайи сечкийрин нетижаяр кьуна акьалтIарнава. Россиядин Госдумадиз,­ РД-дин Халкьдин Собранидиз хкянавай депутатрин арада чи ватанэгьлиярни ава. Газет кIелзавайбуруз чна абурукай куьруь малуматар гузва.

РФ-дин Госдумадиз Дагъустандин патай цIи 8 депутат хкянава. Сапижат Мазаева, Энвер Набиев, Хизри Абакаров, Тагьир Хайбулаев, Шуми Шабатаев, Нурбаганд Нурбагандов, Мегьамед Валихов, Жамал Кьасумов. Абурукай сад - СВО-дин иштиракчи, Россиядин Игит Энвер Набиев лезги я (бинеяр – Ахцегь райондин Чеперин хуьряй).

ГьакIни Госдумадин депутат яз хкянавайбурун арада бине Кьурагь район­дин Гелхенрин хуьряй тир, виликдай Ульяновскдин областдин губернатор яз кIвалахай Абдулгьамид Эмиргьамзаевни ава. Ам Ульяновскдин ва Самарадин областрин патай хкянава.

Чи ватанэгьлийрикай РД-дин Халкьдин Собранидин VIII созывдин депутатар хьанвайбурун арада ава: Имам Яралиев (СтIал Сулейманан район), Осман Абдулкеримов (Ахцегь район), Самир Абдулхаликьов (Кьурагь район), Девлетхан Алиев (Кьурагь район), Марат Алияров (СтIал Сулейманан район), Марат Мирзеханов (СтIал Сулейманан район), Мурад Мурадов (Докъузпара район), Омар Нагъиев (Мегьарамдхуьруьн район), Арсен Пирмегьамедов (СтIал Сулейманан район), Тельман Рагьимов (Дербент шегьер), Фирудин Ражабов (Докъузпара район), Аким Ханвердиев (Каспийск шегьер).

ГьакIни чи ватанэгьлияр тир Сулейман Керимовакайни (Дагъустандин патай) РД-дин виликан кьил Сергей Меликовакай (Брянскдин областдин патай) Федерациядин Советдин членар (РФ-дин сенаторар) хьанва.

«Лезги газетдин» редакциядин коллективди цIийиз хкянавай депутатриз, сенаторриз и агалкьун мубаракзава. Къуй чеб мадни еке дережайрив агакьрай! Чи халкьдихъ жуьреба-жуьре рекьерай гьялна кIанзавай месэлаяр тIимил авач. Депутатри и рекьени гьахълудаказ, намуслудаказ, чи ватанэгьлийрин итижар фикирда кьуна, кIвалахдайдак умуд кутазва.

"Лезги газет"