«Таниш хьухь: Вагьабов Мирзамет Эседуллагьович, кьа­кIиви, адетдинди тушир кьисметдинни жуьрэтлувилин инсан, чи девир­дин кьегьал! Шарвилидин халис неве ла­гьай­тIани жеда… », – ихьтин­ гафаралди Мирзаметахъ галаз зун Вирироссиядин ветеранрин ватанпересвилин «Женгинин стхавал» тешкилатдин­ (1997-йисуз арадал гъана, председатель – Советрин Союздин Игит Б.В. Громов) Ахцегь райондин отделенидин председатель Руслан Сулейманова танишарна.

КIекIецни гвачиз кIубандиз къекъвезвай ам дявядин гьерекатрин иштиракчи, женгера кьве кIвачни хкатнавай 1-группадин инвалид, Россиядин МВД-дин ОМОН-дин махсус подразделенидин къуллугъчи, генерал В.И. Налимован заместитель яз, Дагъустанда «Казакрин ва дагъвийрин союз» объединенидин председатель, есаул (майордин дережа), гьукуматдин ва ведомстводин гзаф шабагьрин сагьиб тирди чир хьайила, чун тажуб хьана. Москвада яшамиш жезвай ам СВО-дин шартIара жегьилриз ватанпересвилин тербия гунин месэлайра чаз куьмекун патал хайи ватандиз хтанва.

Куьруь къейд. Мирзамет Вагьабов 1977-йисуз Ахцегь райондин­ КьакIа­рин хуьре дидедиз хьана. 1993-йисуз хуьруьн мек­теб­ акьал­тIарна, Махачкъалада ДГТУ-дик экечIна. Вичик би­недилай­ гьахълувал, адалатлувал, дуьзвал хьтин пак ерияр квай уьтквем жегьилдивай, гьа макъамдин гьахъсузвилер акваз, вичи хкягъай­ пешедай кIвалахал акъвазиз хьанач. Ам МВД-дин ОМОН-дин жергейрик экечIна ва сифте йикъалай ватан къенепатай чу­кIурзавай бандитрихъни тахсиркаррихъ галаз бари­шугъ тежер женгиник экечIна. Гьавиляй я жеди, 2009-йисан январдиз террористри адан чандиз къаст авуна: машин хъиткьинна, гьамишалугъ набут яз туна, амма руьгьдай авудиз хьанач. «За жув набут яз гьиссзавач», – уьтквемдиз ихтилатзава игитди.

Далудихъ Кеферпатан Кавказда бандитрин яракьлу дестейрихъ галаз кьиле фейи къати женгерин тежриба галай игитдивай секиндиз ксуз жезвач. 2024-йисалай ам «Женгинин стхавал» тешкилатдин Москвадин областдин лап активный членрикай сад я. Гьана казакрин генерал В.И. Налимоваз викIегь дагъвидин алакьунар акуна, адакай вичин куьмекчи авуна ва, есаул чин гуналди, Дагъустанда «Казакрин ва дагъвийрин союз» объединенидин председателвиле тайинарна.

– Авайвал лагьайтIа, и йи­къара зун хуьревай яшлу ва кефсуз буба Эседуллагьал (ам Чернобылдин АЭС-дин вакъиайрин ветеран, 2-группадин набут я) кьил чIугваз хтана. Гьа са вахтунда «Женгинин­ стхавилин» Ахцегь, Докъузпара, Мегьарамдхуьруьн районрин отделенийрин кIвалахрихъ галазни мукьувай таниш жезва. Чкайрал жегьилрихъ галаз ватанпересвилин тербиядин месэлаяр вилик кутун, чкадин отделенийрин председателриз зегьмет къейд авун патал Разивилин чарар, грамотаяр хканва ва жувалай алакьдай куьмекар гузва. Дяведин четин шартIара чпин хушуналди жемиятдин важиблу чIехи кIвалах кьиле тухузвай абуруз, гьелбетда, районрин кьилевайбуру кьетIен фикир гун лазим я. Аквазвайвал, Дагъустанда Афгъанистандин дяведин ветеранрин гуьгьуьл къачун тавун дуьз туш. Абуруз, гьич тахьайтIа, юбилейдин медалар гуз, ватанпересвилин тербиядин мярекатриз желб ийиз, теклифиз хьайитIа, хъсан я.

– Мирзамет стха, ван хьайивал, контрактник яз, ваз СВО-дин жергейриз физ кIанзава.

– Эхь. 1-группадин инвалид тирвиляй арза элкъуьрна. Дяведин рекьяй пешекар яз, ватандиз закай гьана хийир гзаф жеда. Залан хирерилай кьулухъ сифте гьар са патахъай гзаф четин тир, протезрив вердиш тушир. Гила, лугьурвал, реабилитация хьанва. ЦIийи протезар алукIайла, кIекIецни герек хтанач. Дяведиз физ гьазур я, мад са арза кхьида.

– Вавай «Женгинин стхавилин» Ахцегьрин хилен, адан председатель Руслан Сулейманован кIвалахдикай вуч лугьуз жеда?

– Абурукай заз виликрай, садра Ахцегь райондин администрация­диз атайла, хабар хьана. Атана килигайтIа, дугъриданни, Руслан Сулейманова ина ватанпересвилин зурба кIвалах тухузва, сагърай вич! А чIавалай кьулухъ тербиядинни мергьяматлувилин хейлин месэлаяр чна санал гьялзава. Кьилди къачуртIа, мяргьяматлувилин куьмекдин шейэр гваз чун са шумудра Донбассдиз аскеррин патав фена. 

Районда жегьилриз ватанпересвилин тербия гунин, фронтдив мергьяматлувилин куьмек агакьарунин, Ватан патал чанар ганвай жегьилар рикIера хуьнин, СВО-дин иштиракчийрин хизанрин гуьгьуьл къачунин жигьетдай адан алахъунрикай гьатта Москвадани хабар ава.

Дашдемир ШЕРИФАЛИЕВ