Европада виридалайни кьакьанда авай Къурушрин хуьре са кьадар вахт идалай вилик балкIанраллаз чамарар авунай турнир кьиле фена. Машгьур тренер Фейруз Къулиева хабар гайивал, кьуд лагьай сеферда тешкилай и турнирда цIи 12-дав агакьна шегьеррайни хуьрерай атанвай саки 350 касди иштиракна: Къуруш, КIелет, Миграгъ, Къаракуьре, Хив, Тпигъ, Луткун, ЦIийи Фригъ, ЦIийи Усур, Хпуькь хуьрерайни Буйнакск, Дербент шегьеррай.

Акъажунар кьиле тухун патал пулдин такьатар чара авурбурун арада «Т9» кофейня, алишверишдин «Лакзан» ва «Ново-Мака» кIвалер авай. Абурулай гъейри, Къурушрин хуьруьн бязи векилрини и кардик чпин пай кутуна.

Гъалибчийриз медалар, грамотаяр, пулдин пишкешар ва маса савкьатар гана.

«Заз и акъажунар хъсан дережада аваз тешкилунин карда куьмекар гайибуруз виридаз сагърай лугьуз кIанзава. БалкIанраллаз чамарар авун неинки са чкадин, гьакI маса районрай, шегьеррай къвезвай мугьманрин арадани лишанлу вакъиадиз элкъвенва. Гьавиляй и акъажунар идалай кьулухъни, адет хьанвайвал, гьар йисуз тешкилда. Спортдин мярекатди жуьреба-жуьре миллетрин векилрин арада стхавал, дуствал мягькемарзава, сагълам уьмуьрдин гьакъиндай таблигъат­ тухузва», – лагьана Фейруз Къулиева.

Чи мухбир