И йикъара РД-дин Халкьдин Собранидин депутат Имам Яралиева СтIал Сулейманан райондин администрацияда­ Кьасумхуьруьн 17 тагъдикай ибарат муьгъ цIийикIа туь­кIуьр хъувунин месэладиз талукьарнавай совещание кьиле тухвана.

РикIел хкин, архитектурадин республикадин дережадин метлеб авай и надир имаратдин 100 йис тамам хьанва. Алай йисан гатфарихъай къвайи къати марфарин нетижада вацIай атай селлерикди муькъуьн пуд тагъ (тахминан 35-40 метрдин мензилда) михьиз чкIана. Алатай асирдин 20-йисара эцигай­ и муьгъ неинки Кьасумхуьруьн­ кьве пай сад-садахъ галаз ала­къалу ийизвай «дамар», гьакIни райондин медениятдин, тарихдин ирсинин зурба ярж я. Адан къванцикай эцигнавай цлари хейлин йисара Чирагъ вацIун терсвилиз дурум гана.

Лагьана кIанда, и муьгъ рес­публикадин метлеб авай медениятдин ирсинин объект я ва ам федеральный дережадин къанунди хуьзва. Яни талукь идарайрин патай ихтиярар авачиз, ам цIийикIа туькIуьр хъувунин кIвалахрив эгечIдай мумкинвал авач.

Совещанидал хабар гайивал, райондин администрацияди герек чарар-цIарар къайдадик кутун патал тайин кIвалах кьиле тухванва, РД-дин медениятдин ирсинин объектар хуьнин рекьяй кардик квай Агентстводиз ва маса ведомствойриз чарар рекье тунва.
Имам Яралиева къейд авурвал, муьгъ къайдадиз хкун гьукуматдин дережадин месэла я ва, са рахунни алачиз, цIийикIа туькIуьр хъувунин кIвалахрал меценатарни желб ийида.

«Чи кIвалах адетдин эцигунрихъ галаз ваъ, чи халкьдин хейлин несилрин арада авсият­ хуьзвай чан алай тарихдихъ галаз алакъалу я. Чи везифа, а муькъуькай менфят къачудайла, агьалияр патал хатасузвални къулайвал таъминарун ва алай аямдин шартIара гьикьван­ жезватIа, гьакьван дережада адан тарихдин къамат хуьн я. Де­путатрин корпусди и месэла кьетIен гуьзчивилик кутада», – лагьана И. Яралиева.

Совещанидин нетижада ­ге­лежегда кьабулдай, кьилиз акъуд­дай серенжемар, мярека­тар тайинарна. Сифте нубатда­ муькъуьн сагъзамай паяриз технический рекьяй къимет гун патал лицензия авай кархана тайинарда ва муьгъ къайдадик кухтун патал проектдин документация гьазурда.

Агьмед Магьмудов