Са гьафтедин къене Дагъустанда бензиндин къимет 6,6 процентдин агъуз аватнава. Росстатдин делилрал асаслу яз, ихьтин рекъемар «Новости» РИА-ди раижна.

Санлай къачурла, кудай шейинин къиметар уьлкведин 46 регионда агъуз аватнава. Виридалайни гзаф – Севастополдани Крымда – тахминан 15 процентдин. Абурулай кьулухъ Вологодскдин област къвезва, ина бензин саки 12,5 процентдин ужуз хьанва.

Дагъустандикай рахайтIа, ам бензиндин къимет 5-6 процентдин ужуз хьанвай муьжуьд региондин арада ава. Мадни кудай шейинин къиметар агъуз аватнавай субъектрин арада Тюмендин, Ивановодин, Новосибирскдин областар, Коми, Марий Эл, Карачаево-Черкесия ава.

* * *

Россияда алай йисан сад лагьай паюна рекьера виридалайни пара аварияр жезвай регионриз талукь рейтинг гьазурнава. «Новости» РИА-дин делилрал асаслу яз, ана Дагъустанди 32 чка кьунва. Чешмедин малуматралди, им республикада гьалар хъсанбур туш лагьай чIал я.

Кьилди къачуртIа, Дагъустанда рекьера жезвай аварийрин кьадар алай йисуз – 30 процентдин, абурун нетижада телеф, хирер-кьацIар хьайибурун кьадар 39 процентдин артух хьанва.

Виридалайни тIимил аварияр жезвай регионрин арада Чечен Республика, Москвадин ва Брянскдин областар ава. Виридалайни пара – Тувада, Калмыкияда ва Костромадин областда жезва.