Адет хьанвайвал, гьар йисуз августдин вацран кьвед лагьай киш юкъуз чи уьлкведа Физкультурникдин югъ къейдзава. И вакъиадиз талукьарна республикадин шегьеррани районра спортдин рекьяй хейлин акъажунар кьиле фена. Гьа жергедай яз Кьурагь райондани.

«Лезги газетдиз» муниципалитетдин администрациядин пресс-къуллугъди хабар гайивал, Физкультурникдин йикъан сергьятра аваз, КьепIиррин хуьре футболдай, кьезил атлетикадай, спортдин милли жуьрейрай акъажунар тешкилнавай. Чебни цIи 11-сеферда кьиле фена. Турнирдин тешкилатчийри сагъламвал мягькемаруниз, спорт вилик тухуниз таъсирзавай ихьтин мярекатдик кьил кутунай КьепIиррин хуьре кардик квай мергьяматлувилин «Абад Капир» фондунин векилриз сагърай лагьана.

Гьар йисуз тухузвай акъажунрин кьилин макьсад адетар хуьн, акьалтзавай несилар сагълам уьмуьр тухунал желб авун, абуруз, милли адетрикай менфят къачуна, тербия гун я. Турнирда, санлай къачурла, 250 касди иштиракна: 5-6 йисар хьанвай аялрилай гатIунна, чIе­хибурал къведалди. Ашкъи авайбур патал ГТО-дин нормативар вахкудай махсус майданни арадал гъанвай.

Акъажунра гъалиб хьайи ва кIвен­кIвечи чкаяр кьур вирибуруз шабагьар гана. Кьилди къачуртIа, абур кубокриз, медалриз, грамотайриз ва пулдин пишкешриз лайихлу хьана. Турнир давам хьайи кьве юкъузни спортсменривай, иштирак­чийривай, мугьманривай тIямлу ашни дагъларай кIватIнавай хъчар квай чай дадмишиз жезвай.

«Абад Капир» фондунин куьмекдалди акъажунрин пишкешрин фонд 170 агъзур манатдив агакьна. Спортдин мярекат­да виридалайни активнидаказ иштиракайбурукай сад Украинада кьиле физвай­ махсус серенжемдин иштиракчи, запасда авай полковник, государстводин ва ве­домствойрин шабагьрин сагьиб Нияз­ Мирзоев тир. Къейд ийин хьи, хайи чилихъ рикI кузвай ватанпересди Дагъустандин гьукумдин кьилевайбурувай КьепIиррин хуьре спортдин тIебии тушир (искусственный) майдан туькIуьрун тIалабнава. 

Агьмед Магьмудов