Жемятдин куьмекдалди
Мукьвара къвайи къати марфарин нетижада Докъузпара райондин Къаракуьре хуьр хъвадай целди таъминарзавай цин чешме кардикай хкатнавай. Ам хъувун ва хуьруьз хъвадай яд хгун къаракуьревийрин са дестеди вичин хивез къачуна.
Цин чешме кардик кухтунин кIвалахра иштиракай Россиядин журналистрин союздин член, тарихчи Эдуард Гьажибегова чаз хабар гайивал, хуьруьз яд дагъдин чкадай саки 10 километрдин мензилдай турбайра аваз гъизва. Гадайри 100 метрдин мензилда турбаяр цIийибуралди эвезна. Турбаяр лагьайтIа, хуьруьн администрацияди (кьил – Гьасанбег Балабегов) чара авуна.
Къара булах тIвар алай чешме туькIуьр хъувунин карда Казум, Бейбала, Мевлидин Шамурхановри, Фаидин Айдемирова, Зафидин ва Бакидин Ханвердиеври, Равиль Мегьамедшафиева, Жанибег Эмирчубанова, Жамил Ашумова, Низами Асварова, Алимегьамед, Гималай Балабеговри, Юрий Шарифова, Уьлмет Медетова, Аким Фетхиева, Рашид Гуьлагьмедова, Эмираслан Амирагьмедова, Велихан Исмиханова иштиракна.
Гадайри дагъдин къекъвез ва хкаж жез четин рекьерай балкIанрин куьмекдалди турбаяр хкажна, техника галачиз, хсуси къуватралди турбаяр кардик кутун патал лекъвер акъашна, хуьруьз яд хгана.
Э. Гьажибегова гьакIни хабар гайивал, цин Къара булах чешме авай патахъ физвай рехъ бязи чкайрилай кьвалар ацахьунин нетижада кардикай хкатнава. Улакьар фин патал и рехъ гуьнгуьна хтунайтIа, хъсан жедай. Идалай кьулухъни, марфар къвана, цин чешме кардикай хкатдач лагьана, заминвал садавайни гуз жедач. Ихьтин дуьшуьшра техника фидай рехъ хьайитIа, кIвалах фад ва регьятдиз кьилиз акъудиз жеда.
Агьмед Магьмудов