Зарар гузва

24-августдиз ВСУ-ди кьуд шегьерда авай «Озондин» склад­рал гьужумна. «РИА Новости» чешмеди хабар гайивал, Украи­надин боевикри Краснодарда, Махачкъалада, Адыгейскда ва Невинномысскда кардик квай «Озондин» дараматрал беспилотникар ахъайна. Нетижада бязи складри цIай кьуна, къуллугъчияр лагьайтIа, вахтунда хатасуз чкадиз акъудна.

Мидяди ийизвай инсансузвилин гьерекатрилай тафаватлу яз, Россиядин кьушунри анжах военный къурулушриз ягъунар кьазва. ВСУ-ди чи жуьреба-жуьре регионрал ахъайзавай беспилотникри ислягь инсанриз хасаратвилер гузва, агьалияр телеф жезвай дуьшуьшарни ава. Гьар юкъуз Россиядин кьушунри ПВО-дин такьатрин куьмекдалди мидядин вишералди беспилотникар язава.

РФ-дин оборонадин министерстводи 24-августдиз малумарай делилралди, СВО кьиле тухунив эгечIайдалай инихъ Россиядин Яракьлу Къуватри Украинадин 674 самолет ва 284  вертолет, зенитный ракетайрин 669 комплекс, пилот галачиз лув гудай 218809 аппарат, 30710 танк ва дяведин маса машинар, РСЗО-дин 1775 машин, артиллериядин ва маса 36255 яракь, военный махсус 70068 автомашин тергна.

Есирар азад хъувуна

24-августдиз Белоруссиядин мулкара Россиядини Украинади есирвиле гьатай аскерар сада-садав вахкунин серенжем кьиле фена. Идакай «Первый информационный» телеканалди хабар гана.

«Украинадин 10 ватандаш ва идалай вилик есирвиле аваз хьайи Россиядин 10 аскер чпин кIвалериз хъфена», – лагьанва чешмедин малуматда.

Къейдзавайвал, есирар сада-садав вахкунин нубатдин серенжем Белоруссиядин президент Александр Лукашенкодин тапшуругъдалди кьиле фена. Идалай вилик Белоруссиядин мулкара ихьтин серенжем 19-августдиз кьиле фенай: Россия­диз 103 аскер хтана, гьакьван боевикар Украинадивни вах­кана. 

Къалмакъал веревирдна

США-дин госсекретарь Марко Рубиодини Германиядин къецепатан крарин министр Йоханн Вадефула ислен юкъуз телефондай Украинада авай къалмакъал къайдада туниз ва Ирандин ядерный программадиз саналди аксивал къалуруниз талукь месэлаяр веревирдна. «РИА Новости» чешмеди хабар гузвайвал, идакай США-дин госдепартаментдин векил Томми Пиготта ихтилатна. 

«Абуру Россиядинни Украинадин арада мягькем ислягьвал тайинарунин важиблувал веревирдна. ГьакIни абуру Ормуздин проливда гимияр азаддаказ финин жигьетдай США-ни Германия рейсад фикирдал алайди тестикьарна. Идалайни гъейри, Иранди садрани ядерный яракь арадал тагъунин, маса къачун тавунин месэлада кьве терефдин фикирар сад тирди малумарна», – лагьанва Пиготтан малуматда.

Пашинянан къаст

Н. Пашиняна малумарайвал, мукьвара Эрменистанди­ Евросоюздик экечIунин патахъай арза вугуда. Адан гафар «NEWS.am» чешмеди раижнава.

«Эрменистандиз мукьвара Европадин союздин членвиле кьабулун патал арза вугудай гьерекатрик кьил кутадай ният ава», – лагьана Эрменистандин гьукуматдин кьили.

Идалай вилик, 7-августдиз, Пашиняна Евразиядин экономикадин союздик (ЕАЭС) ва я Европадин союздик экечIунин месэладай махсус референдум тухун тийидайди малумарнай.

Пашиняна алава хъувурвал, ЕС-дик экечIиз кIанзавай уьл­кве референдум тухуниз мажбур туш, и месэлади анжах Брюсселди тестикьарнавай гьерекатар кьилиз акъудун истемиш­зава.

Сиягьдай акъуднава

США-дин финансрин министерстводи малумарнавайвал, Сирия терроризмдиз къаюмвалзавай уьлквейрин сиягьдай акъуд­нава. Идакай «РИА Новости» чешмеди хабар гузва.

«Президент Дональд Трампа Сириядиз акси санкцияр кьезиларунин жигьетдай хиве кьур кар кьилиз акъудуналди, США-дин гьукуматдин департаментди Сирия терроризмдиз пулунин куьмек гузвай государствойрин сиягьдай акъуднава», – кхьенва Америкадин минфиндин малуматда.

Къабачияр я лагьана

Дональд Трампа Канададин сиясатчияр, кьилди къачуртIа, уьлкведин премьер-министр Марк Карни, Онтарио вилаятдин премьер-министр Даг Форд, абуруз «къабачияр» лугьуналди, меземмет авуна. Алишверишдин месэладай кьве терефдин арада хьайи рахунар нетижасузбур хьайидалай кьулухъ США-дин президентди Оттавадиз таможнядин харжарин жигьетдай судурар заланбур хьунин къурху гана.

Гьазурайди – К. Ферзалиев