И йикъара чав пашман хабар агакьна. 78 йисан яшдаваз гьукумдин органра чIехи къуллугъар авур, РД-дин Халкьдин Собранидин депутат хьайи, милли газетдин редакциядихъ­ галаз датIана сих алакъа хвейи  Нагъметуллаев Агъадаш­ Нуьс­ретович рагьметдиз фена.

А. Нагъметуллаев 1948-йисуз Докъузпара райондин Гъепцегьрин хуьре муаллимдин­ хизанда дидедиз хьана. Буйнакскдин педагогвилин училище­ куьтягьна хтай жегьилди хуьруьн школада кIвалахна. Ар­мия­да къуллугъ авурдалай ­гуь­гъуьниз ада Липецкдин гос­университетдин тарихдин факультет акьалтIарна ва областдин Данкован райондин Балов­нёво хуьруьн школадин дирек­тор­вилин везифаяр кьилиз акъудна.

1975-1982-йисара А. Нагъметуллаев образованидин идарайра регьбервал гудай къуллугърал (Ярагъ-Къазмайрин юкь­ван школадин, республикадин школа-интернатдин директор) хьана.

1982-йисалай Агъадаш Нуьс­­ретович партийный ва со­вет­рин кIвалахдал элячIна. КПСС-дин Мегьарамдхуьруьн­ райкомдин идеологиядин от­дел­­дин заведующий, райсоветдин председателдин заместитель, район­дин администра­ция­дин кьилин сад лагьай за­мес­титель яз, ада райондин эко­номика, яшайишдин хилер вилик тухуник вичин зегьметдин пай кутуна.

1994-йисуз Дагъустан Рес­пуб­ликадин Госсоветдин къарардалди А. Нагъметуллаев­ Ме­­­гьарамдхуьруьн райондин ад­­ми­нистрациядин кьилин къул­­лугъдал тайинарна.

1997-йисалай 2012-йисалди Агъадаш Нуьсретовича РД-дин Халкьдин Собранидин аппаратда кIвалахна. Эхиримжи йисара ада Мегьарамдхуьруьн райондин Жемиятдин палатадиз регьбервал гузвай.

А. Нагъметуллаева гьукумдин органра гьакъисагъвилелди чIу­гур зегьмет  государстводин шабагьралди къейднава. Чешнелу хизандин кьил тир адахъ вад велед ва цIуругуд хтул ава. 

Къени инсан, хъсан юлдаш яз, Агъадаш Нагъметуллаева вичихъ галаз санал кIвалахай ва чидай ксарин арада еке гьуьрмет къазанмишна.

«Лезги газетдин» редак­циядин коллективди рагь­мет­­­лудан хизандиз, багъ­рий­риз­, дериндай хажалат чIу­­гу­нив­ди, башсагълугъвал гузва.

"ЛГ"