Нетижаяр  кьадай сочинение кхьин патал Госкъуллугъар порталдин куьмекдалди тахминан 70 процент арзаяр  агакьнава. Декабрдиз 11-классрин выпускник­ри  ва экстернри нетижаяр кьадай сочинение кхьидайвал я. Алай йисуз 53 регионда сифте сеферда яз имтигьан вахкун патал арза Госкъуллугърин сайт­дай агакьариз жезва. Эхиримжи делилралди, порталдай  200 агъзурдалай гзаф арзаяр ганва. Им акI лагьай чIал я хьи, къуллугъдикай адак тIем акакьзавай кьадардин тахминан 70 процент выпускникри менфят къачуна.

Нетижаяр кьадай сочиненидай «зачет» къачун – им государстводин нетижаяр кьадай аттестацияда (ГИА), гьа жергедай яз ЕГЭ-да иштиракдай ихти­яр гузвай шартIарикай сад я. Хушунал­ди ам, эгер вузрик экечIдай фикир аватIа, алатай йисарин выпускникривайни кхьиз жеда.

Арза гудай ихтияр выпускникдиз вичиз, адан диде-бубадиз ва я законлу­даказ векилвалзавай касдиз (яшар тамам тахьанвай аялдин патахъай) ава.

Алай йисуз нетижаяр кьадай сочинение кхьидай асул вахт 2-декабрь (декабрдин сад лагьай арбе югъ) я. Алава йикъар: 2027-йисан 3-февраль  ва 14-апрель. Ада иштиракун патал арза 18-ноябрдилай геж тушиз (сочинение кхьидай йикъалай кьве гьафтедин вилик)  агакьарна кIанзава.

Сочинение кьабулун патал ам, гьич тахьайтIа, 250 гафуникай ибарат хьун лазим я. Эгер гафар тIимил аватIа, «незачет» эцигда. Хъсан къимет къачун патал 350 гафунилай гзаф хьана кIанда. Идалайни гъейри, кьилин истемишунрик аялди фикирар вичин гафаралди ачухарун ква.  Сочинение кхьин патал 3 сятни 55 декьикьа гуда. Сагъламвилин мумкинвилер сергьятламиш тирбуруз и вахт са сятни зуран давамар хъийида.

Жасмина Саидова