И йикъара Докъузпара райондин администрациядин печатдин кьилин орган тир «Эренлардин сес» газетдин 25 йис тамам жезва. Адан тарихдикай, ам арадал атай гьаларикай «Лезги газетдин» алатай нумрадиз акъатай Шагьбала Шагьбалаеван макъалада тамамдиз раханвай.

«Эренлардин сес» чап­дай акъатиз 25 йис алат­на­ватIани, девирар, муниципа­литетдин регьберар, издани­дин редакторар дегиш хьа­на­тIани, газетди вичин кьилин макьсад дегишнач: коллективди, виликдай хьиз, гилани райондин агьалийрал цIийи хабарар, малуматар агакьариз, хайи чIал хуьнин ва вилик тухунин макьсаддиз вафалувилелди къуллугъзава.

Газетдин редакцияда жуь­­реба-жуьре йисара чIал хъсандиз чидай, журналистикадин рекьяй тежриба авай, кар алакьдай пешекарри кIвалахна. Абурукай сада – Куругъли Ферзалиева – алай вахтунда «Лезги газетдин» кьилин редактордин заместитель яз кIвалахзава. Газетдин мад са векилди – шаир Шагьбала Шагьбалаева – республикадин дережада аваз хайи чIалал акъатзавай кьилин газетдихъ галаз алакъаяр хуьз гзаф йисар я.

Алай вахтунда «Эренлардин сес» газетдин кьилин редак­тордин везифаяр Вадим Агъамурадова тамамарзава. Чна кьилди гьадаз, редакциядин коллективдиз, райондин агьалийриз газетдин 25 йисан юбилей мубаракзава. Къуй газетдин къулав гьамиша хайи чIалан къадир авай, тежрибалу, бажарагълу мухбирар хьурай, газет кхьизвайбурун, кIелзавайбурун кьадарни тIимил тахьуй!

Гьуьрметдивди,

«Лезги газетдин» редакциядин коллектив.