МВД-дин хроникадай
Тапан малумат гун зарафат туш
Кьве гьафте идалай вилик дежурно-диспетчерский къуллугъдиз малум тушир жегьилди зенгна ва ада Вини Казанище хуьруьн 1-нумрадин мектебдал гуя яракьламиш хьанвайбуру гьужумнава лагьана хабар гана.
Полициядин къуллугъчияр тадиз чкадал фена, амма ахтармишай вахтунда зенгинай гайи хабар тестикь хьанач. Дараматда ва адан къваларив гвай мулкара хъиткьиндай затIар авачир.
Гьа и юкъуз полицейскийри зенг авурди дуьздал акъудна. Ам 15 йисан яшда авай, винидихъ тIвар кьунвай мектебдин ученик яз хьана. Тамам яшдив агакь тавунвай гадади хиве кьурвал, санал кIелзавай юлдашдин телефон къачуна, ада зарафат патал ЕДДС-диз зенгна. Ингье и зарафат адаз багьаз акъвазна: жегьилдиз талукь яз РФ-дин УК-дин 207-статьядин 2-паюнай уголовный дело къарагъарна.
МВД-ди рикIел хкизва: терроризмдин гьерекатрикай тапан малуматар гун гьакIан женжелвал туш, им 14 йисалай виниз яшар хьанвайбур уголовный жавабдарвилиз чIугвазвай тахсиркарвал я. Ийимир ихьтин зарафатар!
Футболистрин арада къалмакъал
Махачкъаладин полицейскийри гьевескарвилин футболдин матчда иштиракай 2 жегьилдин арада хьайи къалмакъалдай кьил акъудзава.
Шегьердин Кирован райондин полициядин отделдин къуллугъчийри тайинарайвал, ЦIийи Параул поселокдин 28 йисан яшда авай агьалиди футболдин майдандал къалмакъал арадал атай вахтунда Рутул райондай тир 32 йисан яшда авай агьалидин бедендиз хасаратвилер гана. Гуьгъуьнлай ам азарханадиз аватна.
Полициядин къуллугъчийри шак физвайди кьуна ва агьвалатдай кьил акъудун патал ам отделдиз хкана. Ада ихтилат авурвал, футбол къугъвадай чIавуз абурун арада гьуьжетар хьана. Гуьгъуьнлай гьуьжетар кукIунриз элкъвена, къалмакъалдин вахтунда сада муькуьди тIар жедайвал са шумудра яна, нетижада адан бедендиз бегьем хасаратвал хьана.
Агьвалатдай кьил акъудун давам жезва.
Кьве гьафтеда 56 ДТП
Дагъустандин МВД-дин Госавтоинспекцияди хабар гузвайвал, 26-октябрдилай 9-ноябрдалди республикадин рекьера 56 авария хьана. Абурун нетижада 13 кас кьена, 67-дал (абурукай 6 аялар я) жуьреба-жуьре хирер хьана.
Госавтоинспекциядин къуллугъчийри машинар гьалзавайбуруз рекьера гьерекат авунин къайдайрал амал авуниз, мукъаятвал хуьниз эвер гузва.
"Лезги газет"