Дяведин махсус серенжемда Кьурагь райондин саки вири хуьрерай кьегьалри иштиракзава. ЦIудралди аскерар, офицерар государстводин шабагьриз лайихлу хьанва. Кьурагьвийри армиядин жергейра къуллугъзавай гьалдилай командиррини разивалзава.

Мукьвара райондин Кьуьчхуьррин хуьряй тир Назиля Керимовадин тIварцIихъ мотострелковый 252-полкунин командирдилай чар хтана. Ана военный частуниз атайдалай кьулухъ уставдин вири къайдайрал рикIин сидкьидай амалзавай, уьтквемвилелди аскердин везифаяр тамамарзавай Гьажи Маратович Керимов хьтин хва тербияламишнавай диде-бубадиз сагърай лугьузва.

«Куь хва Гьажи Керимова вич жавабдар, низамлу, кьегьал, уьтквем аскер хьиз къалурзава. Ада вичин аскервилин буржи намуслувилелди кьилиз акъудзава, военный пешекарвиляй устадвал хкажзава. Кьунвай кьинез вафалу яз, гьихьтин четин тапшуругъар хьайитIани, тамамардайдахъ инанмишарзава.

Гьуьрметлу Назиля Руслановна, Куьне гайи тербия себеб яз, адак Ватан хуьдай халис аскердин ерияр ква: буржи гьисс авун, дурумлувал, руьгьдин мягькемвал, кIеве авайдаз куьмек гун, Россиядин армиядин женгинин адетриз ­гьуьрмет авун. Ам вичин кардив эгечIзавай тегьер Куьне хцел чIугур зегьметдин, адаз ганвай тербиядин нетижа я. Яргъа аватIани, ада датIана куь патай кIанивал, даяхвал гьиссзава. Ватандиз вафалу хва тербияламишунай Квез чухсагъул!

Чир хьухь хьи, Гьажидин тарифлу къуллугъдал чи вири час­туни дамахзава. Квевайни куь намуслу, кьегьал хцел дамах ийиз жеда.

Полкунин командирдин везифаяр тамамарзавай

подполковник А. Дульцев».

Хуьруьн школадилай кьулухъ гуьгъуьнлай Гьажиди кIе­­лунар КIирийрин спортдин школа-интернатда давамар хъувуна. Ина ада спортдин рекьяй хъсан вердишвилер къачуна. Беден лигимарна, вири уламрай викIегьдиз экъечIиз чирна.

Абад Азадов