Ахцегь райондин виридалайни вине авай къадим Хинерин хуьре зун са шумудра мугьманда хьанай. Хуьр дагъларин къужахда экIя хьанва, къвалавай Самур вацIни авахьзава. Са гафуналди, гзаф гуьрчег чка я, килигуналди вилер тух жедач.
Хинерин хуьруьхъ еке тарих ава. И кар хуьре авай куьгьне дараматри, жуьреба-жуьре къванерал атIанвай кхьинри, чIехи кимери ва маса делилри тестикьарзава. Ина умудар пайдай пIирни ава. Чкадин агьалийриз адан тарих гьихьтинди ятIа малум туш. Инсанар анал мурадар тIалабиз физва ва рикIе умудар аваз хквезва.
Садра зунни фенай умудар пайдай пIирел. Ина еке тарцин кIаник хьран кIвал авунва, ана пич ва фу чрадай сач ава. Пичинал гьамиша цив ацIанвай чайдан ала. Патавни — харада тун-вай кIарасар.
ПIирен вилик квай еке майданда сурар экIя хьанва. Аник Надир шагьдихъ галаз кьиле фейи женгера телеф хьайи Хинерин хуьруьн итимар кучукнава. Белки, пIирни гьа девирда арадал атанатIа?
Ватандин ЧIехи дяведин йисара пIирел бицIи аялар пара жедай. ГьикI лагьайтIа, саки гьар юкъуз хуьре авай дишегьлийри хьар кутадай. Садбуру дагъдин атирлу векьерикай чай ийидай, муькуьбуру сачунал фу чрадай, мухакай, гьажибугъдадикай калар ийидай, картуфар чрадай. Рагъ дагъларик акатдалди абуру Аллагьдивай дяве фад куьтягь хьун, фронтдиз фенвай итимар сагъ-саламатдиз хуьруьз хтун, дуьньяда ислягьвал хьун тIалабдай. Гьар са дуьадилай кьулухъ аялри “амин” лугьудай. Югъ няни хьайила, абур рикIера экуь мурадарни умудар аваз кIвалериз хъфидай.
Гзаф кьадар инсанар телеф хьанатIани, дявени куьтягь хьана, чи аскерри Гъалибвал къачуна. Хинерин хуьряй акъатай сад лагьай къагьриман Гьасрет Алиеван гьуьрметдай чубан Агъабала Агъабалаева еке межлис къурмишнавай, ада хуьруьнвийрин арада са шумуд мал-лапагдин як садакьа яз пайнай.
Къенин юкъуз Хинерин хуьруьн акьалтзавай несилрин векилри чпин чIехи бубайрин баркаллу крар рикIелай алудзавач, абурулай чешне къачузва, абуруз ухшар жез алахъзава.
Бикеханум Алибегова
