Нижний Новгорадда кардик квай Да­гъустан­дин халкьарин милли медениятдин центрадин председатель, «Лезги газетдин» амадаг Алимегьамед Магьсубова хабар гайивал, 14-сентябрдиз Дербент райондин Агълабрин хуьряй тир Магьсубоврин хизанди шегьерда кьве сувар къейдна: сихилдин чIехи стха Къазимегьамед Мегьамедовичан 70 йисан юбилей ва рагьметлу буба, Дагъустан Республикадин лайихлу мелиоратор, СССР-дин ВДНХ-дин къизилдин медалдин сагьиб Мегьамед Магьсубович Магьсубов дидедиз хьайидалай инихъ 100 йис тамам хьун.

Къейд ийин, Дербентдин райондин собранидин депутат хьайи Мегьамед Магьсубов 35 йисуз Агълабрин хуьруьн агъсакъалрин советдин кьиле акъвазна. Вичин вахтунда ада хуьр аваданламишуник лайихлу пай кутуна, гьа жергедай яз сурар жугъундалди кIевна.

Багърийри бубадин регьимлувилер, ада авур хъсан крар рикIел хкана. Мярекатда иштиракай жегьил дагъустанвийри чешнелу ватанэгьлийрикай ийизвай ихтилатрихъ дикъетдивди яб акалзавай.

Шад межлисдин иштиракчийри милли кьуьлер авуна. Имидиз бахшнавай виридалайни хъсан кьуьл Бесията авуна. Раинат Мегьамедовнади Етим Эминан «Дустариз» шиир фасагьатдиз кIелна. «Чи бубайрин ватан Кьурагь райондин Цилинг хуьр я, гьелбетда, чун лезги шииратдин буба яз гьисабзавай Е.Эминан мукьва-кьилиярни жезва», ­­– кхьенва Да­гъустан­дин халкьарин милли медениятдин центрадин пресс-къуллугъдин малуматда.

Чна Алимегьамед Магьсубоваз, адан сихилдиз шадвилин вакъиаяр мубаракзава.

Чи мухбир