РД-дин Кьилин везифаяр вахтуналди тамамарзавай Фёдор Щукина Россиядин лайихлу артистка, Дагъустандин халкьдин артистка, машгьур манидар Жасминав республикадин гьуьр­метдин «Мергьяматлувиляйни хъсан крарай» гьукуматдин шабагь вахкана. Гуьруьш 14-сентябрдиз Махачкъалада кьиле фена.

«Лезги газетдиз» РД-дин Кьилин пресс-къуллугъди хабар гайивал, гатфарихъай яд акьалтунин нетижада зиянар хьайи дагъустанвийриз куьмек гун патал Жасмина ва адан хизанди 500 миллион манат пулдин такьатар чара авуна. Идалай гъейри, машгьур манидардин куьмек­далди Мамедкъала поселокда цIийи кIва­лер эцигнава, чкадин агьалияр хъсан ери­дин хъвадай целди таъминардай проект кьилиз акъудзава.

Шабагь вахкудайла, Фёдор Щукина къейд авурвал, гьуьрметдин шабагь, темягь авачиз, хъсанвилер ийизвайбуруз, мергьяматлувилин адетар давамарзавайбуруз сагърай лугьунин лишан я. Четин чIавуз Жасмина ватанэгьлийриз (ам 1977-йисуз Дербент шегьерда дидедиз хьана) куьмек гуналди, вич чIехи ватанперес, хайи республикадихъ рикI кузвай кас тирди тестикьарна.

«Жасмина алай вахтундани Да­гъустанда мергьяматлувилин серенжемар кьиле тухузва. Мисал яз, ада чара авунвай пулдин такьатрихъ Кас­пийск шегьердин са районда, жуь­ре­ба-жуьре себебар аваз, ачухиз тахьай аялрин бахча, ремонтдин кIва­лахар акьалтIарна, ишлемишиз вахкуда.

Дагъустан патал ийизвай хъсанвилерай, хайи чил рикIелай алуд тавунай, регьимлувиляй за Жасминаз ва адан хизандиз рикIин сидкьидай сагърай лугьузва. Чна адан куьмек гьиссзава ва еке къимет гузва», – лагьана Ф. Щукина.

Агьмед  Магьмудов