Украинадин милли хатасузвилин ва оборонадин советди (СНБО) Россиядин компанийриз ва кьилдин ксариз талукь яз США-ди малумарай хьтин санкцияр малумарнава. Идалайни гъейри, инлай вилик сергьят эцигай серенжемрин муддат артухар хъувунва. И гьакъиндай «Хабарар» РИА-ди раижнава.

Украинадин президент П. Порошенкоди малумарнавайвал, санкцияр гуя Россияди Великобританияда химиядин яракьар ишлемишунихъ ва Крымдин сергьятра гуя къанунсуздаказ президентдин сечкияр кьиле тухунихъ галаз алакъалу я.

Цlийи санкцияр юридический ва физический ксариз талукьарнава. Санкцийрин сиягьдик 17 чиновник ва 14 тешкилат, 7 карчи, гьа жергедай яз чи ватанэгьли Сулейман Керимовни акатнава.

«Лезги газет»