ЧIехи Гъалибвилин — 80 йис
Урдухановар Мацар хуьруьн чIехи сихилрикай садбур тир, абурун ата-буба Насруллагь — эцигунардай тIвар-ван авай устIар. Ада дагъдин хуьре хкIатIнавай къванерикай, сад-садав агудна, эцигай кьве мертебадин кIвали инсандин фикир вичел желбдай. КIвалин цлар къени ама.
Сад лагьай мертеба къванцин чархарал ала. КIвалин варар, пенжерар хъсан нехишар алаз кIарасдикай туькIуьрнава.
Насруллагь, Агьмед, Абас ва Садедин Урдухановар чпин хизанарни галаз санал яшамиш жезвай. Гуьгъуьнлай гьа кIвале ирсдарар, абурун рухваяр Муса, Абил, Урдухан ва Сулейман яшамиш жез хьана.
Хуьруьнбуру лугьузвайвал, и хизандай 5 кас Ватандин ЧIехи дяведин иштиракчияр хьана.
Урдуханов Муса Садединович 1922-йисуз Мацарин хуьре дидедиз хьана. 1942-йисан августдиз фронтдиз тухвана. Ада Нальчик шегьер патал женгера иштиракна. Кьуьд гзаф мекьиди тир. Дагъдин чкада женгинин буйругъ тамамардайла, ам пис азарлу хьана ва госпиталдиз ракъурна. Ахпа комиссияди, сагъламвилин гьалдиз килигна 1943-йисан ноябрдиз кIвализ рахкурнай. Адаз «Кавказ хуьнай» медаль гана.
Урдуханов Абил Садединович 1923-йисуз дидедиз хьана. 1943-йисуз адаз армиядин жергейриз эверна.
Ветерандин рикIел хкунрай: «Гуьгьуьллувилелди фронтдиз физвай чи дестеда 500 кас авай. Ахцегьрин къеледал кьван чун музыкадалди рекье туна. Анай Белиждин станциядал яхдиз фена.
Сифте женгера герек чирвилер чна Грузиядин Гори шегьерда лишанчийрин 88-полкуна къачуна. Пуд вацралай Украинадин фронтдин полкуниз акъатна.
Душмандихъ галаз дяведин женгиник Черниговдин областдин Березина лугьудай чкада экечIна. Женг чIугваз, Днепр вацIал агакьна. ВацIалай элячIдайла, чи гзаф аскерар телеф хьана. Захъ галай зи дуст, хуьруьнви, школадин муаллим, Къужаев Микаил Гьажибеговичал залан хер хьана. Нубатдин женгина зи кIвачелни хер хьана, госпиталда сагъ хъувуна мад фронтдиз хъфена.
Зун маршал Коневан регьбервилик квай Белоруссиядин 1-фронтдин артиллериядин 1-полкуниз акъатна. Варшава азадна, чи частуни фашистрин Майданек лагерь кьуна, есирар азадна…».
Висладинни Одердин операциядилай кьулухъ Германиядин чилел кьиле фейи дявейра 1945-йисан 7-февралдиз эрчIи гъилел хер хьайи кьегьал мад госпиталдиз аватна. 1945-йисан 25-июлдиз 2-группадин инвалид яз армидай хтана.
Дяведа къалурай жуьрэтлувилерай Урдуханов Абилаз Баркалладин 2-дережадин ва Ватандин дяведин орденар, 8 медаль гана.
Урдуханов Урдухан Агьмедович 1924-йисуз дидедиз хьана. 1943-йисан 20-майдиз гуьгьуьллудаказ армиядиз фена. Ветерандин гафаралди, Белиждин ракьун рекьин станциядилай Азербайжан галайвал рекье гьатнай. Махсус курсар куьтягьай сержант авиациядин частуниз ракъурна. Адал зенитный туп ихтибарна. 1944-йисуз «Женгинин лайихлувилерай» медаль гана.
Дяведилай кьулухъ пуд йисни зура артиллериядин частуна старшина яз къуллугъна.
1948-йисан зулуз армиядай хтана, Буйнакск шегьерда финансовый техникум акьалтIарна, Ахцегьа райфинотделда кIвалахна.
Алай девирда бубайрин баркаллу крар цIийи несилри давамарзава.
Баламет Ширинов
