Саласа юкъуз Фёдор Щукина ДГТУ-да кардик квай военный учебный центрада чирвилер къачунвай са жерге жегьилрив военный билетар вахкуниз талукьарнавай мярекатда иштиракна.

«Куьн неинки гражданвилин, гьакI военный рекьяйни пешекарар я. Центрада къачунвай чирвилери, хьанвай тежрибади квез герек дуь­шуьш­ра жавабдар къарарар кьабулиз куьмекда. Веонный рекьяй квез ганвай тIварар мубаракрай ва квекай хайи Ватандиз вафалувилелди къуллугъдай ватанпересар хьурай!» – лагьана региондин Кьили.

Мярекатдилай кьулухъ Фёдор Щукин центрадин кIвалахдихъ галаз таниш хьана. Ина вузда кIелзавай бязи студентриз военный рекьяйни алава чирвилер гузва. Курсантар патал махсус классар кардик кутунва ва герек тир тадаракралди таъминарнава. Пешекаррин, гьа жергедай яз СВО-дин иштиракчийрин регьбервилик кваз военный рекьяй жуьреба-жуьре вердишвилер къачузва.

И проект РФ-дин оборонадин ва образованидин министерствойрин куьмекдалди кьилиз акъудзава.

"Лезги газет"