Шабагьар вахкана
Пешекарвилин сувар – Муаллимрин югъ – къейд авуналди, Мегьарамдхуьруьн райондин кьил Нариман Эфендиева райондин мектебра зегьмет чIугвазвай 50-дав агакьна муаллимрив шабагьар вахкана.
Муаллимрихъ элкъвена рахадайла, райондин кьили абурун зегьметдин акьалтIай важиблувиликай кьетIендаказ лагьана. «Куь зегьмет чи райондин ва вири уьлкведин гележег эцигзавай бине я. Акьалтзавай несилдин вилик чирвилерин алем ачухзавай, абуруз фикир ийиз, яратмишиз ва лайихлу ватандашар жез чирзавайбур куьн я», - къейдна ада вичин тебрикда.
Нариман Эфендиева кIвалахдив пешекарвилелди эгечIунай, хъсан адетриз вафалувал хуьнай ва образованидин гьерекатда алай аямдин къайдаяр ишлемишунай муаллимриз чухсагъул лагьана. КьетIен фикир ада мектебра кIелзавай аялрин агалкьунризни гана, гьикI хьи, муаллимдин кIвалахдин бажарагълувал тестикьарзавайди адан гъилик чирвилер къачур аялрин агалкьунар я.
Райондин педагогриз тебрикдин гафар райадминистрациядин образованидин управленидин начальник У. Абейдуллаева, райондин депутатрин собранидин председатель Н. Алиярова лагьана. Абуру муаллимриз гьар йикъан гьакъисагъ зегьметдай рикIин сидкьидай чухсагъул лагьана.
Къейд ийин хьи, муаллимриз шабагьар гун – им неинки абурун зегьметдиз гьуьрмет авунин лишан, гьакIни райондин образованидин къурулуш дурумлудаказ вилик тухунин рекье йигинвал кутазвай, гьевесламишзавай важиблу себебрикай сад я. Гьаниз килигна, райондин администрацияди муаллимрин теклифрин тереф хуьн ва абуруз пешекарвилин рекьяй вилик фидай мумкинвал тешкилун патал шартIар яратмишун давамарда, хабар гузва Мегьарамдхуьруьн райондин администрациядин пресс-къуллугъди.
Муаллимрин зегьмет муниципальный, республикадин ва федеральный дережадин шабагьралди къейдна.
***
Муаллимрин пешекар суварин сергьятра аваз, Ахцегь райондани муаллимриз ва аялрин бахчайрин тербиячийриз шабагьар гунин шад мярекат кьиле фена, хабар гузва муниципалитетдин администрациядин информациядин къуллугъди.
Сувар тебрикунин келимаяр лагьайдалай кьулухъ муниципальный
тешкилатдин кьил Абдул-Керим Палчаева къейд авурвал, муаллимдин пеше вичихъ виридалайни еке игьтияж авайбурукай
сад я: муаллимди аялдиз чирвилер гузва, адан къилихдин виридалайни хъсан ерияр
тербияламишзава, гележегдин несил арадал гъизва.
Абдул-Керим Палчаева муаллимриз мягькем сагъламвал, кIубанвал, зегьметдин рекье еке агалкьунар хьун алхишна.
Жасмина Саидова