РикIелай тефидай мусибат
16-ноябрдиз Каспийскда 1996-йисуз, 30 йис идалай вилик, кьиле фейи терактдин къурбандрин экуь къамат рикIел хкуниз талукьарнавай мярекатда Дагъустандин Гьукуматдин председателдин сад лагьай заместителдин везифаяр вахтуналди тамамарзавай Рамазан Жафарова, Каспийскдин администрациядин векилри, Росгвардиядин Дагъустанда авай Управленидин начальник, полковник Вадим Кузнецов кьиле аваз тероргандин вири подразделенийрин командирри, Россиядин ФСБ-дин Дагъустанда авай сергьятар хуьдайбурун управленидин кьиле авай ва ана къуллугъзавай ксари, республикадин къанун-къайда хуьзвай маса къурулушдин регьберри ва чкадин агьалийри иштиракна.
Мярекатдин иштиракчийри терактдин къурбандриз хкажнавай гуьмбетдал цуьквер эцигна, абурун экуь къамат, са декьикьада кисна акъвазуналди, рикIел хкана. Яс чIугунин лишан къалурун яз, гьуьрметдин къаравулри командадалди санлай пуд сеферда цавуз тфенграй яна, шемерикай «Помним» гаф туькIуьрна ва цIудралди лацу шарар цавуз ахъайна.
– Мусибатдин и вакъиа чи рикIел алама ва багърияр телеф хьайи ксарихъ галаз чнани дерт чIугвазва. Телеф хьайибурун, иллаки аялрин, экуь къаматар чи рикIера гьамишалугъ яз амукьда. Чи везифа ихьтин мусибатдин вакъиаяр мад тежедайвал агьалийрин хатасузвал таъминаруникай ибарат я, – къейдна Вадим Кузнецова.
Рагнеда Рамалданова