ЦIийи ктабар

Москвада, «Грифон» чапханада, бине Ахцегьрин хуьряй тир алим, шаир, чешнелу хизандин кьил рагьмет­лу Къейседин Алиеван уьмуьрдин юлдаш Гьанифат Садилагьовнадин «Летящие листья жизни» ктаб  урус чIалал акъатнава.

Гьанифат Алиевади вичин уьмуьр муаллимдин баркаллу пешедихъ галаз алакъалу авуна: 50 йисуз Каспийск шегьердин 2-нумрадин юкьван мектебда чIехи классра кIелзавай аялриз математикадай чирвилер гана. Яргъал йисарин гьакъисагъ зегьметдай ам жуьреба-жуь­ре медалар, гьуьрметдин грамотаяр ва маса шабагьар гуниз лайихлу хьана.

Гь. Алиевадин уьмуьрдин юл­­даш Къейседин Алиева, вичел чан аламаз, вичин эсеррин­ «Югъ ва Йиф» ктаб чапдай акъуд­­най. Уьмуьрдин юлдаш кьейи­далай кьулухъ къайгъудар ирссагьиб Гь. Алиевади лезги ва урус чIаларал адан кьве ктаб ахкъудна.

Гь.Алиевадин ктаб рикIел хкунрикай, мемуаррин жанрда аваз кхьенвай гьикаятдин куьруь эсеррикай ибарат я. Ктабда гьакIни таржумачи Евгений Чеканова урус чIалаз элкъуьрнавай Къ.Алиеван шиирарни гьатнава. Ктабдиз сифте гаф МФТИ-дин муаллим, алим Низами Абдулгьамидова кхьенва.

КIелдай ашкъи авайбурувай ктаб интернет-туьквенрай маса къачуз жеда.

Чи  мухбир