Россиядин Президент Владимир Путинан Указдалди Дагъустандин Арбитражный суддин кьиле Роман Ражков тайинарнава. 17-августдиз ам суддин коллективдихъ галаз танишаруниз талукьарнавай мярекат кьиле фена. Ана РД-дин Кьилин везифаяр вахтуналди тамамарзавай Фёдор Щукинани иштиракна.

Р. Ражкова 2009-2015-йисара­ Красноярскдин крайдин Арбитраж­ный судда судья яз кIвалахна. 2015-йисан январдилай Севастополдин Арбитражный суддин судьядин везифаяр тамамарзавай. Ам юридический илимрин кандидат я.

РФ-дин Верховный суддин пред­се­да­телдин заместитель Игорь Крупнован гафаралди, Р. Ражковахъ хъсан тежриба ава. Идалай гъейри, адаз кар алакьдай тешкилатчидин алакьунарни хас я. «Вичихъ авай чирвилерикайни тежрибадикай ада цIийи къуллугъдал гегьеншдиз менфят къачудайдахъ чун инанмиш я», – лагьана, И. Крупнова Р. Ражковав Дагъус­тандин Арбитражный суддин председателдин шагьадатнама вахкана.

Вичин рахунра Ф. Щукина къейд авурвал, пешекар юрист Р. Ражков­а   суддин къурулушда еке рехъ атIан­ва. «Арбитражный суд уьлкве экономикадин рекьяй дурумлудаказ ви­лик финин бине я. Къе и рекье авай хъсан адетар хуьн ва алай аямдин истемишунар гьисаба кьун важиблу я. И карда лагьайтIа, къастунал кIевивал авун, гьахълу хьун, къанундал кIевелай амал авун герек я. Вири и ерияр Роман Алексеевичаз хас я», – лагьана респуб­ликадин регьберди.

Чи  мухбир