Дагъустандин халкьарин садвилин суварин вилик республикадин Кьилин везифаяр вахтуналди тамамарзавай Фёдор Щукина яшайишдин жуьреба-жуьре хилера тафаватлу хьайи са жерге дагъустанвийрив гьукуматдин шабагьар вахкана. Идакай «Лезги газетдиз» РД-дин Кьилин пресс-къуллугъди хабар гана.

Гьакъисагъ зегьмет къейд авунвайбурун арада Украинада кьиле физвай махсус серенжемдин иштиракчияр, духтурар, муаллимар, волонтерар, алимар, медениятдин деятелар ва масабур ава. Фёдор Щукина къейд авурвал, садбуру, чпин уьмуьр хаталувилик кутуна, Ватандин часпарар хуьзва, садбуру далу пата кIвалахзава, начагъбур сагъар­ хъийиз­ва, несилриз чирвилер гузва, милли адетар хуьзва, илимдал машгъул жезва…

«Чун гъавурда ава, чи ватанэгьлийри са гьихьтин ятIани шабагьарни тIварар патал зегьмет чIугвазвач. Абуру чпин буржи яз гьисабзавай кIвалах кьиле тухузва. Амма чи везифа абурун зегьмет акун ва гьар юкъуз­ вичин халкьдиз къуллугъзавайбур къейд авун я», – лагьана Ф. Щукина.

«Лезги газет»