Россиядин Федерациядин Советдин Председатель Валентина Матвиенко 15-сентябрдиз Дагъустандиз мугьманвиле атана. Дагъустан Республикадин Кьилин везифаяр вахтуналди тамамарзавай Федор Щукинахъ галаз санал ада Махачкъалада кардик кутунвай РФ-дин оборонадин министерстводин военный госпиталдал кьил чIугуна.

Алай аямдин 150 койкадин медидара Каспий гьуьлуьн къерехда эцигнава. Ада армияда къуллугъзавайбур ва абурун хизанар виниз тир еридин медицинадин куьмекдалди таъминарзава. Гос­питалдихъ поликлиника, сагъардай ва диагностикадин, азарлуяр къаткидай ва инфекциядин корпусар, администрациядин дарамат гала. Армияда къуллугъзавайбуруз хирургиядин, терапиядин, нев­рологиядин, инфекцийрин, стоматоло­гиядин ва реанимациядин отделенийрин духтурри къуллугъзава. Алава яз, герек тир маса кабинетарни кардик ква.

Валентина Матвиенкоди госпиталда сагъламвал мягькемарзавай дяведин махсус серенжемдин иштиракчийрихъ галаз суьгьбетарна. Ада къейдна хьи, государстводи госпиталда къатканвайбуруз вири рекьерай  куьмек гун лазим я.  Гьа са вахтунда мягькемдиз кIвачел ахкьалтун патал гуьгъуьнлайни аскеррин гьакъиндай къайгъу чIугун герек я.

Федор Щукина реабилитациядин та­мам корпус проектламишзавайдакай­ ха­бар гана. Ада медицинадин комплексный программаяр уьмуьрдиз кечир­миш­да.

Госпиталдин мулкуна Валентина Мат­­виенкоди ва Федор Щукина везифаяр кьилиз акъуддайла телеф хьайи военный медикар рикIел хкана, абурун мемориалдал цуьквер эцигна. Идалай гъейри, абуру Дагъустандин Госсоветдин Гьуьр­метлу Председатель Мегьамедали Мегьамедован ва Дагъустандин халкьдин шаир Расул Гьамзатован гуьмбетрал кьил чIугуна ва анрал цуьквер эцигна.

Дагъустандин халкьарин садвилин югъ къейдзавайла, Валентина Матвиен­ко халкьдин художественный сеняткарвилерин пешейрин «Адетар хуьзвайбур – 2026» международный фестивалдин экспозицийрихъ  галаз таниш хьана. 2023-йисалай Дагъустанда кьиле тухузвай и зурба мярекатда Россиядин 18 региондин ва гьакI Узбекистандин, Къиргъизистандин, Тажикистандин, Белоруссиядин устадри, дизайнерри, креативный индустриядин векилри иштиракзава­. Дагъларин уьлкведин сеняткарри 12 майдандал чпин гъилин алатар, безекар ва маса шейэр къалурзавай. 

Фестивалдин иштиракчийрихъ галаз гуьруьшмиш хьайила, Валентина Матвиенкоди къейдна хьи, Дагъустандин жуь­реба-жуьревал адан еке къиметлувал, багьа девлет я. Республикадин вири миллетрихъ гьейранардай хьтин искусство ава. Идан гьакъиндай ада лагьана: «Ихьтин гуьзел шейэр гьазурза­вай устад­риз куьмек гун, жегьилриз кIва­лахдай хъсан шартIар тешкилун, гьазурзавай шейэр маса гудай рекьер жагъурун­ ва халкьдин художественный сеняткарвилин пешеяр вилик тухун важиблу я».

- Сеняткарвал Дагъустандин турист­вилин хел вилик тухудай важиблу хелни я, - лагьана В. Матвиенкоди.  – За фикирзавайвал, федеральный дережада и хилез куьмек гудай алава рекьер жагъур­да. Квезни чизвайвал, РФ-дин Президентдин къарардалди халкьдин художественный сеняткарвилерин югъ тайи­нар­нава. Государстводи абуруз куьмек гун патал субсидияр чара ийизва. Июлдиз Федерациядин Советда РФ-дин милли премия гуниз талукь мярекат хьанай. Кубачидин художественный комбинатди­ са номинациядай гъалибвал къазанмишна.

Вичин нубатдай, Федор Щукина рес­публикада халкьдин художественный се­няткарвилин хел вилик тухун патал гьихьтин галайвилер ийизватIа, гьадакай суьгьбетна.

Федор Щукинахъ галаз гуьруьш­миш хьайила, Валентина Матвиенкоди респуб­лика патал четин гьалар арадал атай гатфарин варцар рикIел хкана.

– Селлери гайи зиянрин нетижаяр арадай акъудун патал куьн гъиле-гъил аваз кIвалахдив эгечIна. Куь регьбервилик кваз исятда яшайишдин объектар ва рекьер, куьчеяр къайдадиз хкизва. ­Дагълух кьве районда школаяр ишлемишиз вахканва. Куьне агьалийриз зиянар ганвай яшайишдин кIвалер ремонт хъийиз куьмек гузва, – къейдна В. Матвиенкоди.

15-сентябрдиз В. Матвиенко ва Ф. Щу­кин дяведин махсус серенжемда иштиракзавайбуруз куьмекар гузвай жемиятдин тешкилатрин векилрихъ галазни гуьруьш­миш хьана.

Дагъустандин регьберди республикадиз кьетIен фикир гунай Валентина Матвиенкодиз сагърай лагьана.

Хийир  Эмиров