МВД-дин хроникадай
22 ДТП
РД-дин МВД-дин госавтоинспекцияди хабар гайивал, 31-августдилай 6-сентябрдалди Дагъустандин мулкара улакьрин 22 авария арадал атана. Нетижада гьафтедин муддатда 8 кас кьена, 27-дал (абурукай 1 аял я) гьар жуьредин хирер-кьацIар хьана.
МВД-дин къуллугъчийри машинар гьалзавайбуруз мад сеферда мукъаятвал хуьниз эвер гузва. Рекьера гьерекат авунин къайдайрал амал тавуникди жуван ва масабурун уьмуьрар хаталувилик кутамир!
Иесидив вахкана
Избербаш шегьердин полициядин къуллугъчийри Сергокъала райондин агьалидив дишегьлиди чуьнуьхай банкунин карта вахкана. Идакай РД-дин МВД-дин пресс-къуллугъди хабар гана.
24-августдиз полициядин отделдин тади серенжемар кьабулдай къуллугъчийри тайинарайвал, 49 йисан яшда авай чкадин агьали дишегьлиди Сергокъала райондай тир 55 йисан яшда авай агьалидин банкунин карта чуьнуьхна ва гуьгъуьнлай адан куьмекдалди туьквендай шейэр маса къачуна.
Малум хьайивал, агьвалат кьиле фейи йикъан няниз дишегьли рекьел гьалтай машинда аваз Махачкъаладай Избербашдиз физ алахъна. Водителрикай сада адаз хутахун теклифна. Амма машин гьалзавайди мукьвал алай АЗС-дал акъвазайвалди, пассажиркадиз иесидин карта жагъана ва ам вичиз къачуна. Гуьгъуьнлай кIвализ хъфидай рекье ада туьквендай маса къачур шейэрин гьакъи картадай гана. И кардикай картадин сагьибдиз телефондиз атай СМС-тел себеб яз чир хьана. Адаз вичин карта чуьнуьхнавайди чир хьана ва и кардикай полициядиз хабар гана. Банкунин карта вахчуна ва иесидив вахкана.
Чи мухбир