21-февралдиз, дидед чIалан Международный йикъан сергьятра аваз, республикадин меркезда, Дагъустандин образование вилик тухудай институтда (ДИРО), Дагъустандин шаиррин эсерар фасагьатдиз кIелунай 11-классра кIелзавай аялрин арада республикадин дережада аваз олимпиада кьиле фена.

Олимпиададин лезги чIалан секцияда, санлай къачурла, 10 аялди иштиракна. Абуру Седакъет Керимовадин, Муьзеффер Меликмамедован, Фейзудин Нагъиеван, Гъулангерек Ибрагьимовадин, Абдул Фетягьан ва маса авторрин шиирар кIелна. Абурун алакьунриз къимет гузвай жюридик ДИРО-дин преподаватель, Махачкъаладин 1-гимназиядин муаллим Нагима Таймурова (председатель) ва «Лезги газетдин» кьилин редактор Мегьамед Ибрагьимов квай.

Олимпиададин нетижада 1-чкадиз Сулейман-Стальский райондин Курхуьруьн 1-нумрадин юкьван школадин ученица Секинат Къачабегова лайихлу хьана. 2-чка Мегьарамдхуьруьн райондин Къуйсунрин юкьван школадин ученица Регина Чигалиевади кьуна. 3-чкаяр кьве касдиз хьана: Кьурагь райондин КIирийрин хуьруьн юкьван шкоалидн ученица Амина Гьамзатовадиз (къейд ийин хьи, ада вичин хсуси шиир кIелна) ва Ахцегь райондин Калукрин хуьруьн юкьван мектебдин ученица Эсминат Шаидовадиз.

Гъалибчийриз ДИРО-дин патав гьуьрметдин грамотаяр гана.

«Лезги газет»