Адет хьанвайвал, пешекар суварин вилик —  ЦIийи йисан сифте йикъара “Лезги газетдин”  редакцияди йисан вахтунда кьиле тухвай кIвалахдин нетижаяр кьуна, кьилди къачуртIа, милли журналистика  гужлу авуник, хайи чIал хуьник кьетIен пай кутурбур, газетдихъ галаз сих алакъа хвейибур, хъсан макъалайрин авторар  вужар ятIа тайинарна, 2017-йис патал малумарай конкурсрин нетижаяр кьуна. 

“Лезги газетдин” сад лагьай редактор, фольклорист,  литератор, чIехи  алим ва общественный  деятель Гьажибег Гьажибегован тIварунихъ галай  премия  — 5000 манат — милли журналистика, литература, илим вилик тухунин кардик пай кутунай гузва.

Редколлегиядин  рейсад тир къарардалди и премиядиз и сеферда Сулейман-Стальский райондин культурадин управленидин  начальник, лезги эдебият­дал рикI алайбуруз истеклу,  бажарагълу шаир, са шумуд ктабдин автор  Майрудин Бабаханов лайихлу хьанва. Адан шиирралди кхьенвай “Келентар” романди кIелзавайбуруз, дугъриданни, таъсирдай жуьреда, са шумуд девирдин шикилар ачухзава.

Лезгийрин машгьур лингвист, филологиядин илимрин доктор, кавказовед, РАН-дин ДНЦ-дин ИЯЛИ-дин бине кутур алимрикай сад, чи халкь патал вичин  метлеб садрани квахь тийидай  ва вичиз тешпигь авачир урус чIаланни лезги чIалан таржумадинни баянрин (переводно-толковый) зурба словарь (35 агъзур гаф)  багъи­шай  Мегьамед Гьажиеван тIвару­нихъ галай  премия  — 3000 манат —  лезги чIал хуьник, чируник, ахтармишуник, девлетлу авуник  пай  кутурбуруз гузва.

И премия, газетдин редколлегияди илимрин доктор, РД-дин илимдин лайихлу деятель, Фаида Гъаниевадиз гунин къарар акъудна. Лезги чIалан месэлайрал дериндай машгъул, чIал хуьник  еке пай кутунвай алимди М.Гьажиеван 120 йис тамам хьунихъ галаз алакъалу яз кхьей маракьлу макъалайри газет кIелзавай ксарин патай рикIин сидкьидай баркалла  къазанмишна.

2017-йис Россияда Экологиядин йис яз малумарнай. И месэла, дугъриданни,  неинки са чи уьлкведин, гьакIни вири инсаниятдин агьалияр патал важиблуди, эхиримжи 10-20 йисан девирдиз вил ве­гьейтIа, иллаки хциди хьанва. Яргъал тефин, хайи республикадикай, кьилди къа­чуртIа, Кьиблепатан Дагъустандин районрикай, Дербентдин къванцин карьеррихъ, Къизил дередин мяденрихъ, Самурдин вацIухъ, тамухъ галаз алакъалу тир, йисар алатзаватIани, гьалар хъсан патахъ дегиш тежезвай месэлаяр къачун.

И месэлаяр датIана къарагъарун, абурал жемятдин, пешекаррин фикир желб авун, акьалтзавай несилар тIебиатдал рикI алайбур яз  тербияламишун  важиблу­ тирди фикирда кьуна, “Лезги газетдини”  алатай йисуз чун элкъуьрна кьунвай тIе­биат хуьнин, яни экологиядиз талукь месэлайрай пуд конкурс малумарнай, премиярни тайинарнай:  3000,  2000 ва 1000 манатдин кьадарда аваз.

Разивилелди къейдна кIанда хьи, и месэлайрай  макъалаяр редакциядиз гзаф атана. Абуруз  фикир гунай, кваз такьуна патавай тефинай квез кьилди чухсагъул лугьуз кIанзава!

1-премия “Лезги газетдин”  кьилин редактордин советник  Шихмурад  Шихмурадова лайихлудаказ къазанмишна. Алатай йисан вахтунда ада газет кIел­за­вайбурун вилик “Инсан ва тIебиат” рубрикадик кваз  экологиядин, тIебиат хуьнин месэлайриз талукьарна кхьенвай макъалаяр гзаф ­гъана. Конкурсда иштиракай “Чилин шардин къацу жигерар” макъалада (№10, 9.03.2017), адан кьиляй аквазвайвал, тамарин, абур хуьнин, чаз нефес багъиш­завай “жигеррив” мукъаятлудаказ, къай­гъу­­дарвилелди эгечIунин месэла ачухарнава.

2-премиядиз  “Лезги газетдин” экономикадин отделдин редактор (и макъаладин автор)  Жасмина  Саидова  лайихлу хьана.

3-премия  Докъузпара райондин Къалажугърин хуьруьн  школадин муаллим, “Лезги газетдин” амадаг  Куругъли  Ферзалиеваз  гун къарардиз къачуна. Газет кIел­завайбуруз  лезги чIалан грамматикадиз талукь месэлайрай кхьей маракьлу ма­къа­лайрин автор яз таниш К.Ферзалиева Самур тамун тIе­би­ат­дикай кхьей макъала конкурсда гъалиб хьанва.

Инал къейд ийиз кIанзава, гьайиф хьи,  конкурсда иштиракун патал чна макъалайриз  талукь яз  ийизвай истемишунрал амал тавун себеб яз, комиссиядивай  вири макъалаяр гьисабдиз къачуз хьанач. И кардиз инлай кьулухъ кьетIен фикир гун тIа­лаб­зава.

Чна гьар йисуз давамарзавай «Хъсан шикил» (премия  — 1000 манат)  конкурсда “Лезги газет”  кIелзавайбуруз фадлай таниш чи амадаг, Сулейман-Стальский райондин Курхуьряй тир чи штатдик квачир мухбир Райсудин Набиев гъалиб хьанва.

«ИкIни жеда кьван!» конкурсдин гъалибчи  (премия — 1000 манат)  Ахцегь райондин Къутунхъарин хуьруьн муаллим Шихмурад Агъакеримов хьанва.

Конкурсра гъалиб хьанвай чи юлдашриз редакциядин коллективди  чпин агалкьунар рикIин сидкьидай мубаракзава.  Премияр ва дипломар “Лезги газетдин” редакцияда вахкуда.

«Лезги газет»